Accessibility links

Владимир Козлов


Түрмеде өткен төрт жарым жыл

Қазақстандағы оппозициялық саясаткер, жабылып қалған «Алға» партиясының жетекшісі Владимир Козлов 2011 жылдың желтоқсанында болған «Жаңаөзен оқиғаларын ұйымдастырды» деген айыппен 2012 жылы қазанның 8-і күні (52 жасында) Маңғыстау облыстық ауданаралық қылмыстық соты үкімімен жеті жарым жылға сотталған. 2012 жылы қарашаның 26-сы күні Козлов жетекшілік еткен тіркелмеген «Алға» партиясының қызметіне сот шешімімен тыйым салынды.

Саясаткердің мүлкі тәркіленді. Оның барлық жылжымайтын мүліктері мемлекет пайдасына алынды.

Владимир Козлов 2014 жылдың наурызына дейін «жазасын» Солтүстік Қазақстан облысындағы ЕС 164/3 колониясында өтеп, кейін Алматы облысындағы Заречный кентіндегі ЛА155/14 түзеу мекемесін ауыстырылды.

Сот кескен мерзімнің жартысын 2015 жылы қазанның 23-і күні өтеп бітірген Владимир Козловтың шартты жазамен босауға құқығы болған еді. Алайда оған түрме басшылығы сөгістер жариялап, саясаткер 2015 жылы шілденің 27-сі күні қатаң жағдайдағы абақтыға («түрме ішіндегі түрме» аталады – ред.) қамалып, босауға арыз беру құқығынан айырылды. Козловтың қорғаушысы Айман Омарова Азаттыққа «түрме басшылығының оны қамау тәртібін бұзғаннан және президент Нұрсұлтан Назарбаев туралы «жағымсыз» пікірлер айтқаннан кейін жазалағанын» хабарлаған. Саясаткер қатаң жағдайдағы абақтыда бір жылдай отырды. Шартты түрде мерзімінен бұрын босауға арыз беруге 2016 жылдың маусым айында ғана мүмкіндігі туды.

Владимир Козловты түрмеден босату туралы сот шешімі шыққаны тамыздың 4-і хабарланды. Төрт жарым жылын түрмеде өткізген саясаткер еркіндікке шығар қарсаңда 56 жасқа толды.

Владимир Козлов пен жақтастары билік таққан айыптардың саяси астары бар деп біледі. Оны құқық қорғау ұйымдары «саяси тұтқын» деп таныған.

XS
SM
MD
LG