Accessibility links

Сот мұғалім Сағидуллаеваның шағымын қанағаттандырды


Айман Сағидуллаева Қарасай аудандық сотының алдында тұр. Алматы облысы, 5 қыркүйек 2016 жыл.

Айман Сағидуллаева Қарасай аудандық сотының алдында тұр. Алматы облысы, 5 қыркүйек 2016 жыл.

Алматы облысының Қарасай аудандық сотында бүгін Жаңатұрмыс ауылдық мектебінің мұғалімі Айман Сағидуллаеваның «өз тәртібін заңсыз талқыға салды» деп мектеп директоры Бекжан Нүсіпбекованың үстінен берген шағымы бойынша өтіп жатқан сотта шешім шықты.

Азаттық тілшісінің хабарлауынша, судья Айгүл Жаңбырбаева Айман Сағидуллаеваның шағымын қанағаттандырып, мектеп директорының мұғалімге "педагогикалық әдеп сақтамады" деп берген ескертуінің күші жойылсын деген шешім шығарды.

Сот шешімі шыққан соң Азаттық тілшісі директор Нүсіпбекованың шешімге қатысты пікірін білмек болған. Бірақ Нүсіпбекова шешімді "Талқылауға жатпайды" деп қысқа қайырды.

Айман Сағидуллаева сот шешіміне риза екенін білдірді.

Алматы облысы Қарасай ауданы Жаңатұрмыс ауылы мектебінде қазақ тілі пәнінен сабақ беретін мұғалім Айман Сағидуллаева 2015 жылы мектеп ұстаздарына тікелей міндеттерінен басқа да артық жұмыстар жүктелетіні жөнінде мәселе көтеріп танылған еді. Оның әлеуметтік желідегі жазбалары мен БАҚ-тағы мақалаларынан кейін әлеуметтік желі қолданушылары сол тұстағы білім және ғылым министрі Аслан Сәрінжіповті мұғалиманы қудалауды тоқтатуға ықпал етуге шақырып, ашық хат жазып, қол жинаған.

Айман Сағидуллаева биыл мамырдың 19-ында мектеп директоры Бекжан Нүсіпбекованың өзіне «әдеп сақтамағаны үшін» берген ескертуімен келіспей, сотқа шағымданған. Ескерту «2016 жылы мамырдың 19-ы күні мектеп аясында Райымбек округінің ақсақалдар кеңесі мүшелерінің кезектен тыс кездесуі барысында педагогикалық әдеп қағидаларын сақтамағаны үшін» берілген. Сағидуллаева соттан ол ескертуді заңсыз деп тануды сұраған.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

XS
SM
MD
LG