Accessibility links

Қазақстандағы сталиндік лагерьлер туралы жаңа кітап шықты


Қарағанды облысы Долинка кентіндегі бұрынғы НКВД бас басқармасы ғимаратында қазір саяси репрессия құрбандарына арналған музей орналасқан.

Қарағанды облысы Долинка кентіндегі бұрынғы НКВД бас басқармасы ғимаратында қазір саяси репрессия құрбандарына арналған музей орналасқан.

Қарағандыдағы «Карлаг: Болашақ үшін есте сақтау» ғылыми-зерттеу орталығы «Ерекше лагерьлер: Минеральный. Горный. Дубравный. Береговой» («Особлаги: Минеральный. Горный. Дубравный. Береговой») деген атаумен сталиндік репрессия жылдарындағы лагерьлер туралы эксклюзивті материалдар жинағын басып шығарды.

Жоба жетекшісі, ұлттық ғылым академиясының корреспондент-мүшесі Нұрлан Дулатбековтың «Интерфакс-Қазақстан» агенттігіне айтуынша, кітапта келтірілген үлкен деректі материал ғылыми айналымға алғаш рет еніп отыр.

Бұл кітап СССР тұсындағы ерекше лагерьлер туралы кітаптар сериясының жалғасы. Алғашқы басылым «Қазақстандағы ерекше лагерьлер: Степной. Песчаный. Луговой. Дальний» («Особлаги в Казахстане: Степной. Песчаный. Луговой. Дальний») деген атаумен жарық көрген.

Нұрлан Дулатбековтың айтуынша, кітапта лагерьлерде қамауда болған тұтқындар саны мен құрамы, қамау мекемесіндегі тәртіп пен тұтқындар қандай жағдайда болғаны, медициналық қызмет сапасы, ауру түрлері мен өлім-жітім көрсеткіші, тұтқындар еңбегін қалай пайдаланғаны және оның көлемі жайлы деректер зерттеліп, сарапталған.

Кітап үш тілде – қазақ, орыс және ағылшын тілдерінде басылып шыққан. «Карлаг: Болашақ үшін есте сақтау» жобасы аясында бүгінге дейін 20-дан аса кітап шыққан.

XS
SM
MD
LG