Секіріп тұрып жағасынан аламын ба? Әлде «жазықтымыз, кешірші бізді» деп, аяғына құлаймын ба? Малайзияның курортына барарлық ақшаны жинауды әлі бастамадым, бірақ,  менің бар мазамды жоғарыдағы сұрақтар қазірден бұзып жүр.

«Олар бізге неге доқ көрстетуі керек?» деп сұрағыңыз келіп отырған болар. Айтайын. Жақында ғана қазақтардың көш басшысы Назарбаев Малайзияға барып келді. «Хабар» телеарнасының төріне жұмақ қондырған айналайын тілшілер Дархан Әбдуахит пен Нұрлан Окалардың айтқандары рас болса, елбасының алдында малай елінің игі-жақсылары құрақтай ұшып, бас құдасын күткендей жүгірген секілді көрінді.

Бас құда демекші, Назарбаевтың Малайзияға расымен де бас құда болатындай жөні бар. Неге десеңіз, былтыр ғана Малайзия премьер-министрінің (не бұрынғы, не қазіргі) үлде мен бүлдеге оранған аққудай қызы Нұрсұлтанның бұрынғы келіні Майра Құрманғалиеваның үлкен ұлының етегінен ұстағанын өсекші интернет сүйінші сұрап, жаһанға жайып жіберген-ді. Бірақ, Малайзияда өткен сол тойға ел аузындағы гу-гу мен ғаламтордағы гуглға қарағанда, қазақтардан отандық полициясының іздеуіндегі Майрадан басқа ешкім бармай, біртүрлі ыңғайсыздау болған екен.

Енді, міне кеткен кемшілік пен түсініспеушілікті осы ғасырдың ғұламасы Назарбаев малай еліне барып түзеп келгендей еді. Бірақ, оның інісі Болат тағы да құдалар алдында қазақтарды жерге қаратқандай. Даудың басы АҚШ-та басталған сотқа қатысты болып тұр. Өздеріңіз білесіздер, бұрынғы ерлі-зайыпты Болат Назарбаев пен Майра Құрманғалива Нью-Йорктегі құны небәрі 20 миллион АҚШ доллары ғана тұратын хан сарайындай пәтерге таласып, қырық пышақ болысып жатыр.

Бұл тартыс енді әлемдік қауымдастық алдында бізді ұяқта қалдыратын түрі бар. Әсіресе, малай құдалардың алдында. «Ей, қазақ құдаларың осындай қырт екен ғой» деген ащы сөзді есту оларға да оңай дейсіз бе? Кеудесін ешкімге бастырмауға тырысып бағатын, құдай қосқан мың жылдық құдамыз ашумен болмаса да, туыстық жанашырлықпен кездескен жерде «Бір пәтерге таласатындай бұларың не?» деп артымыздан аямай тебуі әбден мүмкін ғой. Сонда біз не айтпақпыз?

P.S.  Айтпақшы, Майра Құрманғалиеваның жағдайы түсінікті, қуғында жүрген жанға АҚШ-тан «күрке тауықтық» бір баспана қажет болған шығар. Ал, Болат Назарбаевқа не жоқ, ә? Әлде, саяси баспана сұрап, елден тайғысы келіп жүр ме? Білсеңдер, айтып жіберіңдерші!

Парламентіміздің мәжіліс депутаттары "Қазақпәлеком"... тойыст, "Қазақтелеком"  басшыларының айлық ақшасын біліп алуға бір кісідей белсене кірісіп кетті. Бәрін біліп, есептеп тындырып, сайлаушыларына қашан, қалай айтарын кім білсін. Ал сіз бен біздің білетініміз: осыдан бес-алты жыл бұрын "Қазақтелеком" басшысының  айына үш жүз бірдеңе мың доллар алып отырғаны еді ғой. Президент пен премьер-министрдің айлығын қосқандағыдан әлденеше есе көп болған.

Ал одан беріде еліміздің экономикасы «гүлдеді», халық тұтынатын тауарлар ай сайын «арзандап» жатыр. Кезекті «ғажап» мағлұматтарға сенсек, Қазақстан дүние жүзіндегі ең бай сексен елдің арасында сегізінші орынға ие болыпты. Сірә, келесі жылдары, егер есептегіштеріміз есен-сау болса, біз, бізге ілесе алмай қалған анау Түрікменстандағыша, суық су мен ыстық су, газ бен электр және жылу үшін жарты тиын да төлемейміз - төрт түлігі сай мемлекетіміз халықты солайша қамқорлық аясына алады.
​​
Жұртшылыққа қызмет көрсету ақысы ай сайын қымбаттап отырған жаңағы "Қазақпәлеком", тойыст, "Қазақтелеком" республикамыздың кәрі-жасына  қалта телефонды тегін таратып беріп, тегін сөйлестіреді, тек депутаттар оның басшылары қанша айлық алатындарын анықтап берсе - болды!

Ал бізде анықтайтын нәрсе жетіп жатыр. "Қазақпәлекомдардың" дәл қазір нешеу екені белгісіз: бірі суға ие, бірі буға ие дегендей, электр пәленбаичтің, газ түленбаичтің қолында. Айтып-айтпай не керек, анау мен мынау бәрін бөліп-бөліп алып, «бас-басына би болып», коммуналдық  қызмет дейтіннің нарқы көкке көтеріліп барады. Сөйткен соң, иә, Қазақстанымыз  сексеннің  сегізіншісі  болмағанда  ше?!

Әй, меніңше, біз сексеннің сегізіншісі емес, біріншісіміз! "Қазақтелеком" жабылып қалмас, ашыла  жатар. Мысалға оған дейін ашық тұрғандардың бірін алайық. Айталық, "Қазақмысты". Оның қожайыны Ким деген миллиардердің айлығы 30 000 доллар екен. Күніне 1000 доллар! Жүйкесі жұқарып, көз майы таусыла жаздап  жүрген жиыны неше мұғалімнің,  немесе өзінен бұрын өзгенің денсаулығын  қадағалап қажып жүрген неше дәрігердің бір күнгі еңбекақысы бұл?
​​
Жеріміздің асты-үстіндегі алтын мен күмісімізді, қалайы мен қорғасынымызды, газымыз бен мұнайымызды...  меншіктеп алған жателдік,  өзіміздік алаяқ ашқарақтардың «табысы» Кимнің мынаусынан кемінде бірер есе көп те шығар-ау?!

Егер парламенттегі халық қалаулылары "Қазақтелекомның" «омыртқа-қабырғасын» санай алса, «ішек-қарынын» тазалай алса, шибөрі тірлікті, шиқан бетті басқаларға да көз тігетін болар? Біріккен Араб әкімдігі, Франция, Англия, Түркия, тағы басқа елдердің курортты өңірлеріне қатарлап хан сарайын салып қойған қазекемдердің қайсысына ата-бабасы қадақтап, пұттап алтын қалдырғанына назар аударар. Олардың ішінде "Қазақпәлекомдардың" басшылары неше дана екенін санар.

Уақытқа бай депутат мырзалар тәуелді гәзетсымақтарды да, тәуелсіз гәзеттерді де, бірін ашық, бірін жасырып дегендей, ақтарып-теңкеріп оқитын көрінеді, солардың соңғыларынан айдаладағы  АҚШ-тың Нью-Йорк қаласында әлдебір Назарбаевтың 20 миллион долларға «қора-жай» сатып алғаны, содан бір айқай-ұйқай шығып, мұхиттың арғы-бергі жағына түгел естіліп жатқаны жайындағы мақаланы көздері шалғаны даусыз.

Ендеше, бірі болмаса, бірі: «Оу,«Назарбаев» дейді?! Қой, ойбай, қате жазылған да! Анығын білейікші!» деп қалмас па екен?

(10.05.2012 ж.)