Accessibility links

Непалда зілзала құрбандары 6200 адамға жетті


Непал тұрғыны жер сілкінісінен кейін. (Көрнекі сурет)

Непал тұрғыны жер сілкінісінен кейін. (Көрнекі сурет)

Непалдағы алапат жер сілкінісінен мерт болғандар саны 6200 адамға жеткен. Бұл туралы елдің ішкі істер министрлігіне сілтеме жасап Reuters хабарлады.

Бұған дейін Непал премьер-министрі Сушил Коирала табиғи апаттан қаза тапқандар саны 10 мың адамға жетуі мүмкін деп мәлімдеген еді. Непалда 1934 жылғы зілзаладан 8 мың 500 адам опат болған.

Непал қаржы министрі Рам Шаран Махат тұрғын үйлер мен қоғамдық ғимараттарды қалпына келтіру үшін кемінде 2 миллиард доллар қажет болады деп мәлімдеген. Ол табиғи апат салдарын жоюға халықаралық қауымдастықтан көмек сұрады. БҰҰ деректері бойынша, сәуірдің 25-і күні болған күшті жер сілкінісінің зардабы 8 миллион адамға тиген. Алдағы үш ай бойы 2 миллионға жуық адамға паналайтын шатыр, су және азық-түлік қажет.

Непалдағы зілзаладан зардап шеккендерге көршілес Қытай мен Үндістан жәрдем беріп жатыр. Қытай Непалға 300 әскери қызметшілерін аттандырып, 10 миллион доллардың гуманитарлық көмегін беретінін мәлімдеген. Үндістан әскери-әуе күштері Непалға көмекке 950 адам жіберіп, 400 тонна жәрдем жүгін жөнелткен.

XS
SM
MD
LG