Әзірбайжан президенті Гейдар Әлиев денсаулығына байланысты емделуге Түркияға келген.

Бұл жөнінде хабарлаған мемлекеттік телеарна 80 жасар президенттің қандай дәрігерлік тексерулерден өтетіні турасында нақты айтпаған. Әлиевтің өткен мамыр айында дәрігерлік бақылауда болған Гүлхан әскери медициналық академиясында қаралатыны жөнінде ғана хабарланған. Әлиев Әзірбайжанда соңғы 30 жылдан бері билік тізгінін қолынан шығармай келе жатқан тұлға, соңғы уақыттары оның денсаулығы сыр бере бастаған. Көкек айында Әзірбайжан президентінің аяқ астынан қан қысымы тым төмендеп кетіп, науқастанып жатып қалған болатын.