Палестинаны азат ету ұйымының жаңа басшысы Махмукд Аббастың Израильге қарсы қарулы көтерілісті доғаруға шақыруын Америка Құрама Штаттары қолдайды. Ақ үйдің ресми өкілі Скотт Мак-Клиннанның атап көрсетуінше, қарулы көтерілісті доғару мен Палестинаның қауіпсіздік күштерін біріктіру - өміршең Палестина мемлекетін қалыптастыруға қажетті мекемелерді жасақтау үшін шешуші мәселе болып табылады. Я.Арафаттың қайтыс болуына байланысты Палестинаны азат ету ұйымының басшылығына отырған Махмуд Аббас Лондонда шығатын “Аш-Шарқ әл-Аусат” атты араб газетіне берген сұхбатында: “қару көтеру - палестиндіктердің өзіне қырғын әкелді, ендеше ол доғарылуы керек”, -деп мәлімдеді.
