Қарулы адамдардың шабуылынан Ирақ үкіметінің кеңесшісі қаза тапты

ТАЛЬ-АФАР. Ирақ полициясы елдің солтүстігіндегі Таль-Афар қаласында 14 адамның мәйіттерін тапты. АҚШ әскерінің хабарлауынша, қаза тапқандардың 12-сі оққа ұшқан. Қыркүйектің басында АҚШ пен Ирақ күштері бүлікшілермен соғысып, Туркоман қаласын өз бақылауына алған болатын. Басқа да хабарларға қарағанда, жексенбі күні Бағдадта қарулы адамдар Ирақ үкіметінің кеңесшісі Ғалиб Абдул Мехдині өлтірген. Бұл шабуылға байланысты жауапкершілікті Ирақтағы Әл-Қаида ұйымы өз мойнына алды. АҚШ қорғаныс департаментінің жариялаған мәліметтеріне қарағанда, 2004 жылдың қаңтар айынан бері бүлікшілердің шабуылдарынан 26 мыңға жуық Ирақ азаматы қаза тапқан немесе жараланған.