Ирақта “дәстүрге” айналған кісі ұрлау – Таяу Шығыста жалғасын тауып отыр

ТАЯУ ШЫҒЫС: Иордан өзенінің Батыс жағалауында Тулькарм қаласының іргесіндегі әскери күзет постында бүгін болған жарылыстан, соңғы мәлімет бойынша, 4 адам қаза болғанға ұқсайды және тағы бірнеше кісі жараланды. Жарылғышты жанкешті іске қосты. Тағы бір хабарға қарағанда, жанкештілер екеу болған сияқты. Газа секторында 3 ағылшын азаматын байлап алып кетті. Палестиналық барлау қызметінің мәліметі бойынша, Мысырдан Рафах қаласына келген осы үшеудің бірі адам құқын қорғайтын ұйымның қызметкері көрінеді. Әзірше одан басқа хабар жоқ. Кісі ұрлауды да әзірге ешбір жергілікті топ мойындамай отыр.