Буш америкалық азаматтардың жеке тұрмысы заң негізінде қорғалады деп айтты

АҚШ президенті Джордж Буш ондаған миллион америкалық азаматтың телефон әңгімелері АҚШ барлау мекемелері тарапынан тыңдалады деген жорамалды жоққа шығарды. "Ю-Ес-Ей тудей" газеті бұл шаруаны үш ірі телефон компаниясы атқарып жатыр деп жазған. Президент Буш бұл мәлімет шындыққа сай емес, барлау мекемелері "Әл Қаида" және оның белгілі сыбайластарына қарсы қызмет істейді, жеке азаматтардың телефон әңгімелері сот рұқсатынсыз тыңдалмайды деді.