Олардың арасында полиция сақшылары да бар. АҚШ Бағдадтағы қауіпсіздік шарасын күшейту үшін Мосулдағы 3500-дей сарбазын астанаға көшірмек.

Талдықорғанда Жетісу облысының қылмыстық істер жөніндегі ауданаралық сотында 16 жастағы Шерзат Полаттың өліміне қатысты сот жалғасты. 18 сәуірде жәбірленушілердің жауабы тыңдалды.

Бірінші болып Шерзаттың әжесі Жұмабике Қадырова сөйледі. Оның сөзінше, қайғылы оқиға болған күні Шерзаттың әжесі мен анасына Қаржаубай Нұрымов (Шерзаттың әкесі) хабарласып, олар дереу дүкеннің маңына жеткен.

“Мен таксиден түсіп жатып, жан-жағыма қарап, Шерзатты іздедім. Шерзат көрінген жоқ. Мен Нұрғанатты да, Қаржаубайды да іздеген жоқпын. Ол жерде осыншама көп топ болатынын, балалар үйіліп тұрады дегенді білген жоқпын. Немерем біреуді ұрып қойса, енді не де болса, кешірім сұрайын деп ойладым. Бірақ балам (Шерзат) жеткен адамның жағасына жабысатын бала емес. Боксқа қатысқаннан кейін ол өзінің ар-намысын қорғай біледі. Бәлкім біреу артық кетіп, ол қол жұмсаған шығар деп ойладым. Егер осыншама топ пышақпен келетінін білгенде жедел жәрдем шақырып, милицияға хабарлайтын едім” деді әжесі.

Оның сөзінше, жиналған топ немересін ұра бастаған кезде Шерзатты көрген. Бірақ жете алмаған. Оны айыпталушылардың бірі итергеннен кейін құлап қалған.

“Мен тұра алмай жатырмын, бірақ балаларыма қарасам – Шерзатты сол жерге барған адамның бәрі ұрып жатыр екен. Бір адам қалған жоқ ол жерде – қол көтермеген, аяғымен теппеген. Менің балама сүйтетіндей бұларға не істеп қойғанын әлі күнге дейін түсінбеймін. Менің балам түнде жүретін бала емес. Үйде жатқан бала жәй ғана зарядка үшін дүкенге кеткен еді, ол түнде қаңғып жүретін бала емес. Бірақ [топтың] оны өлтіру үшін барғандары анық болып тұр. Себебі үш машина болып келіп отыр. Дайындалып келіп отырған топ” деді әжесі.

Ол жауап бергеннен кейін залдан шығып кетті. Ақпарат құралдарының жазуынша, ол есінен танып қалып, жедел жәрдем көлігі алып кеткен.

Бұдан соң Шерзаттың анасы Гүлбара Бишимбиева жауап берді. Оның сөзінше, сол күні енесімен дүкен алдына барған кезде топтасып тұрған 10-15 адамды көрген. Шерзат айыпталушылардың бірімен төбелескен. Ізінше топ Шерзат Полат пен Нұрғанат Ғайыпбаевқа жабылады. Өзі Шерзатқа жетпек болған кезде оны айыпталушылардың екеуі қолынан ұстап, жібермейді. Біреуі “сені де өлтіреміз” деп қоқан-лоқы жасайды.

“Жұлқынып, Шерзат жаққа жүгірдім. Сол кезде Шерзат артқа шегініп, құлайды. Оның аузынан бұрқ етіп қан аққанын көрдім. Барып жеткенде ол “мама, мына жағыма қарашы” деп сол жағын көрсетеді. Қарасам, пышақ сұғылғанын көрдім. Бұл кезде Нұрғанатқа да топ жабылып жатады. Оны ұрып тепкілеп болғаннан кейін бір кезде бізге қарай бет алды. Шерзаттың ауыр халде жатқанына қарамастан үш-төрт рет желке тұсынан ұрады. Менің айғайлап жатқаныма қараған да жоқ” деді Гүлбара Бишімбиева

Оның сөзінше, оқиға орнында екі қыз болған, олардан полиция мен жедел жәрдем шақыруды өтінгенде құр қарап тұрып, ештеңе жасамаған.

Ол ұлы мен Нұрғанат Ғайыпбаевтарға нақты кім пышақ сұққанын айтады, бірақ есімдерін шатыстырып алуым мүмкін деп ескертеді.

Мрқұмның әкесі Қаржаубай Нұрымов сотта жанжалдың қалай басталғанын баяндады. Оның сөзінше, ол 3 қазанда жұмыстан кейін кешкі сағат 9-10 шамасында дүкенге көмектесуге барған. Одан кейін айыпталушылардың бірі Дархан Әскентай мас күйінде келіп, сыра мен темекі сатып алған.

Қаржаубай Нұрымовтың сөзінше, ол шығып кеткеннен кейін дүкенге ұлы Шерзат пен досы Ахмет Махмет келіп, зарядка құрылғысы мен құлаққапты алуға келгенін айтқан. Шерзат досы Үрімшіге оқуға кететінін және оны шығарып салғысы келетінін жеткізген.

Оның сөзінше, осы уақытта Дархан Әскентай дүкенге қайта кіріп, Шерзаттың көзінше, әкесімен дөрекі сөйлескен. Бұдан соң Әскентай сыртқа шығып кеткен, оның соңынан Шерзат та ілесе шыққан.

“Терезе ашық болатын. Екеуінің жоғары тонда сөйлесіп жатқанын естіп қалдым. Артынан айналып бардым. Шығып үлгергенше балам ұрып жіберді. Екеуін ажыратып алдым. Ажыратқанда Дарханды былай алып кеттім. Балама ескерту жасадым. Дүкенге қайта айналып кіріп, Дарханнан кешірім сұрадым. Мен оған "жүр, ауруханаға апарайын" дедім. "Емін жасап берейін, ақыңды төлейін. Ішем десең ішімдігіңді берейін" дедім. Ол кешірмеймін, балаларды шақырамын, балаң жауап береді, балаңның денсаулығын қойып тастайды деп айтты” деді Қаржаубай Нұрымов.

Сот кезінде бұған дейін желіде қызу талқыланған "Хутор жігіттері" жөнінде де айтылды. Қаржаубай Нұрымовтың сөзінше, Дархан Әскентай соққыға жығылып, ол өзінің адамдарын шақырғаннан кейін оқиға орнына айыпталушылардың бірі Нұрбол Тоқтаубаев келген. Сөзінше, мас болған. Ол “Дархан Әскентайды кім ұрды?” деп сұраған. Нұрымов ұлын қорғау мақсатында “мен ұрдым” деп айтқан.

Тоқтаубаев “бізді танымайсыңдар ма? Біз Хуторскийдің жігіттеріміз” деп айтты деді оның сөзінен үзінді келтірген Нұрымов.

Кейін дүкен маңына адамдар жинала бастаған шақта Нұрымов 102 және 103-ке хабарласқанмен ешкімді ала алмаған. Бұдан соң Талғар аудананың жедел жәрдем меңгерушісіне хабарласқан. Осыдан кейін ол өзін қорғау мақсатында қолына май кесетін пышақты алып, сыртқа шыққанын айтты.

Дархан, балаңның денсаулығын қойып тастаймыз деген не әңгіме? Кешірім сұрадық қой. Енді не істеуіміз керек? дедім. Бұдан кейін балам “әке, қойыңыз болды, болды” деді. Бұдан соң дүкенге кіріп, пышақты қойдым” деді ол.

Сот кезінде Нұрымов ұлына Абзал Шынасылдың пышақ ұрғанын көрмегенін мойындады. Ол тек Шерзаттың “папа, бірдеңе тығып алды” дегенін естігенін айтты.

“Кейін "балам, қаш" дедім. Ол қашты. Қашқанын көрдім. Пышақ тығып алды деп ойлаған жоқпын. Сүйтсем пышақ тығып алған екен. Кейін біраз жерге дейін барды да отырып қалды. Нұрғанат пен Гүлбара сол жаққа бара жатты. Мен анама қарай жүгірдім, себебі ол құлап жатты. Отырғызып, айналып барам дегенше жаңағыдай жағдайлар болған. Әйелім баласын ұрғызбай қорғаштап жатты. Анасының жылауына, өтінішіне қарамай [баламды тағы бірнеше ұрды]...Пышақты оның артқы жағынан жауырынан тығыпты. Қан ағып жатыр екен” деді ол.

Нұрымов сот кезінде “әділетті шешім күтемін, отбасымды мазаламасын, баламның қанын төккендер тиісті жазасын алсын” деді.

Қылмыстық істе 9 күдікті бар, бірі – кәмелетке толмаған. Бұған дейін басым бөлігі тағылған айыптарды мойындамайтынын айтқан.

• 16 жастағы Шерзат Полат 2024 жылғы 4 қазанда өзінің отбасы жалға алып отырған Талғардағы дүкен маңында қаза болған. Сатып алушылардың бірімен болған даудың аяғы жанжалға ұласып, ол достарын шақырып, суық қару қолданылған. Салдарынан Шерзат мерт болып, оның немере ағасы жараланған.
• Осы оқиғадан бір апта өткенде қара жамылған отбасының үйі түгі қалмай өртеніп кеткен, ол түні үйде ешкім болмаған, отбасы мүшелері Шерзаттың атасының үйінде ас беруге дайындалып жатқан. Полиция өрт әдейі қойылған деп хабарлап, ауданда күзетті күшейткен. Оған дейін марқұмның туыстары әкімдік алдына жиналып, тергеуді ашық әрі әділ жүргізуді талап еткен. Наурыз айында Қазақстанның бас прокуратурасы Шерзат Полаттың үйін өртегендер әлі табылмағанын айтты.
• Шерзат қаза тапқан оқиға кезінде оның қасында болған, пышақтан жарақат алған немере ағасы Нұрқанат Ғайыпбаев былтыр қараша айында Полаттың отбасы тұратын Азат ауылының сырт жағында өлі табылды. Полиция "ол өзіне қол жұмсаған" деп хабарлады. Бірақ марқұмның жақындары Ғайыпбаевтың "суицид жасағанына" сенбейтінін айтқан.
• Нұрғанат Ғайыпбаевтың жаназасы шығарылған күні Шерзат Полаттың әкесі Қаржаубай Нұрымов қолына пышақ ұстап, жүк көлігінің үстіне шығып алып, ұлы мен інісінің қазаларын әділ тергеуді талап еткен. Осыдан кейін оған "бұзақылық" бабы бойынша айып тағылып, Нұрымов 15 күнге әкімшілік қамауға алынды. Кейін оның үстінен "Өзгенің мүлкін қасақана жою немесе бүлдіру" бабымен қылмыстық іс қозғалғаны белгілі болды. Адвокоттары Нұрымов інісінің жаназасы шығарылған күні полицияның арнаулы жасағы көлігінің дөңгелегін тесіп тастағаны үшін жауапқа тартылған деп хабарлады. Онымен бірге екі туысы 15 күнге қамалып, тағы біреуіне айыппұл салынған.

Ресей Жоғарғы соты радикалды "Талибан" қозғалысына салынған тыйымды жойды. Бұл жөнінде ТАСС жазды.

Сот шешімі бірден күшіне енеді.

Ресей билігі ендігәрі "Талибанды" террористік ұйым деп санамайды.

Ресейде "Талибан" қозғалысына тыйым салғанына қарамастан ресми Мәскеу осыған дейін Ауғанстандағы тәліптер үкіметімен қарым-қатынас орнатқан еді. Тәліптердің өкілдері Ресейге сапарлаған. Ресей президенті Владимир Путин қозғалысты Мәскеудің терроризммен күрес бойынша одақтасы деп атаған.

2024 жылы желтоқсанда мемлекеттік дума ұйымды террористік ұйымдар қатарынан алып тастау тетігін жасаған заң жобасын қабылдаған.

"Талибан" Ресейде 2003 жылы террористік ұйымдар қатарына енгізілген еді. Сот қаулысында тәліптердің Шешенстан мен Орталық Азия елдеріндегі заңсыз қарулы топтармен байланысы бары және "Ислам мемлекеті" террористік тобымен тығыз қарым-қатынас жасайтыны жазылған болатын. Ресей сол кезде Ауғанстанда "Талибанға" қарсы операция жүргізген АҚШ пен оның одақтастарына белгілі бір дәрежеде қолдау көрсеткен.

• 2021 жылы "Талибан" Ауғанстан билігін басып алып, президент Әшраф Ғани үкіметін құлатқан. Тәліптер елде шариғат нормаларын енгізіп, дарға асу тәжірибесін қолданады. Ауғанстанда адам құқығы, бірінші кезекте әйел құқығы жаппай бұзылып жатқаны жөнінде ақпарат жиі жарияланады. Елде қыз балалардың білім алуына, әйелдердің қоғамдық орындарға ер туыстарынсыз баруға, жұмыс істеуіне шектеу қойылған. "Талибан" билігінің саясатымен келіспегендер қатаң қуғындалады.
• Тәліптер үкіметін халықаралық қауымдастық мойындамаса да көптеген ел де-факто олармен белгілі бір дәрежеде қарым-қатынас орнатқан.

Украина президенті Владимир Зеленский Қытайды Ресей әскеріне қару-жарақ жеткізді деп айыптады.

Зеленский мұны бейсенбі күнгі брифинг кезінде айтты.

"Маңызды, бірақ өте жағымды емес ақпарат. Бізге Қытайдың Ресейге қару жеткізіп жатқандығы жөнінде мәлімет түсті. Украина қауіпсіздігі қызметі мен барлау жағында оқ-дәрі, артиллерия туралы мәлімет бар" деді ол. Оның сөзінен "РБК-Украина" үзінді келтіреді.

Владимир Зеленский мәліметтің жай-жапсары келесі аптада жарияланатынын атап өтті. Ол сонымен бірге Қытай өкілдері Ресей аумағында кейбір қару-жарақ түрлерін шығарумен айналысуы мүмкін екендігін де жеткізді.

• Бұған дейін Пекин Украинадағы соғысқа еш қатысы жоғын айтып, Ресейге қару-жарақ бергенін мойындамаған. Ресми Пекин соғысты келіссөз арқылы шешуге шақырып келеді. Бірақ ол Ресейге қарсы халықаралық санкцияға қосылған жоқ.
• 8 сәуірде краина президенті Владимир Зеленский Украина әскері Донецк облысында Ресей әскерінің құрамында соғысқа қатысқан екі Қытай азаматын тұтқындағанын хабарлады. Кейінірек ол Украинаның арнаулы қызметтеріне мәлім ақпарат бойынша, Ресей армиясы қатарында кемінде 155 Қытай азаматы соғысып жүр деп мәлімдеді.
• Ал Қытай өз әскери қызметкерлерін Украинаға Ресей жағында соғысуға жібермегенін мәлімдеді.
• Ал тұтқындардың өздері Ресейге ақша табу үшін барғанын, ал соғысқа өздерін алдап салғанын айтқан.

Америкалық The Washington Post газетінің жазуынша, 13 сәуірде Ресей Украинаның Сумы қаласына ракетамен шабуыл жасағанда Сумы университетінің жертөлесінде әскерилерді марапаттау рәсімі болып жатқан. Бұл туралы газетке Украина қарулы күштерінің әскериі айтқан. Ол әскерилер зардап шекпеді деген.

Басылымның дереккөзі марапаттау рәсімін өткізуді "жауапсыздық" деп, бұған Сумы облысы әскери әкімшілігінің басшысы Владимир Артюхты айтыптаған.

13 сәуірде Украинаның Сумы қаласына жасалған шабуылдан 35 адам қаза тауып, 117 адам жараланған. Екі ракета қала ортасына түскен. Сумы облысы Конотоп қаласының мэрі Артем Семенихин шабуыл болған күні Сумыда әскерилерді марапаттау рәсімі болып жатқанын айтқан.

Кейін Артюх 13 сәуірде Сумыда "әскерилерді марапаттау рәсімі жоспарланғанын" мойындап, "менің ұйымдастыруға қатысым жоқ, шақыртылған қонақ болдым" деген еді. Бірақ ол шара өткен-өтпегенін айтпаған.

15 сәуірде Украина президенті Владимир Зеленский Артюхты қызметінен алғаны хабарланды.

Ал Ресей қорғаныс министрлігі Сумыда әскерилерге шабуыл жасалғанын, "60 солдаттың көзі жойылғанын" айтқан.

Бейсенбіге қараған түні Ресей әскері Украинаның Днепр қаласын дрондармен атқылады. Кейінгі мәлімет бойынша, үш адам қаза болған, арасында бір бала да бар.

30 адам зардап шеккен, бесеуі – бала деп хабарлады Днепропетровск облыстық әкімшілігінің жетекшісі Сергей Лысак. 16 адам жарақаттанған, бірінің жағдайы ауыр деп айтылады.

Лысактың сөзінше, Днепрде шамамен он шақты көп қабатты тұрғын үй және жеке үй бүлінген. Оқу орнының корпусы, жатақхана, гимназия, тағам кәсіпорны және өзге де ғимараттар бұзылған. Бірнеше жерден өрт шығып сөндірілген.

Сәрсенбі күні кешке Харьков облысы да соққыға ұшырады. Изюм қаласына дрондар мен ракеталар жіберілген. 6 адам зардап шеккен. Жалпы облыс аумақтарында 17 адам зардап шеккен.

Ресей әскері майдан сызығынан алыс орналасқан Украина қалаларын күн сайын-дерлік атқылап жатыр. Украина қарулы күштерінің мәліметінше, дрондардың көп бөлігі атып түсіріледі.

Талдықорғанда Жетісу облысының қылмыстық істер жөніндегі ауданаралық сотында 16 жастағы Шерзат Полаттың өліміне қатысты сот жалғасты.

Судья Ержан Жанұзақов процеске қатысушы тараптарға ақпарат құралдарына сұхбат бермеуге кеңес берді.

"Сот ашық, оған ақпарат құралдары қатысып жатыр, тікелей эфирде көрсетіліп жатыр. Осыған байланысты жалған ақпарат тарамас үшін сотқа қатысушылардан ақпарат құралдарына сұхбат бермеуді сұраймыз. Кейбір жағдайда, заңға сәйкес бұл сотқа қысым болып саналуы мүмкін" деді Жанұзақов сот басында.

17 сәуір күнгі сотта қорғау жағы да, айыпталушылар жағы да сотты Алматы қаласында немесе Алматы облысында өткізуді сұрады. Олар жолдың қиындығы мен қымбаттығын алға тартты. Бірақ судья бұл жолы да өтінішті мақұлдамады. Ол өткен аптада Алматы облысы Қарасай ауданында тергеу изоляторы жоғын айтқан еді.

Сот кезінде Шерзат Полаттың әжесі мен анасы өздерін жайсыз сезініп, оларға жедел жәрдем көліктері шақырылды. Түстен кейінгі сот отырысына марқұмның әжесі қатысқан жоқ.

Сотта прокурор Шерзат Полаттың қалай қаза болғанын баяндады. Айыптау актісі қорғау жағының өтінішімен қайта оқылып жатқан кезде Шерзат Полаттың әкесі залдан шығып кетті.

"Тергеу болжамынша, алдымен Шынасыл оның жүрегіне пышақ сұққан – жігіт қашып кетпек болғанмен 50 метрден кейін жарақатынан әлсіреп, асфальтқа құлаған. Сосын оған Белғожаев, Ілиясов және басқалары жүгіріп барды. Белғожаев оны басынан тепкілей бастаған, содан кейін пышақ сабымен басынан бірнеше рет ұрған. Ілиясов та мылтығының дүбімен оның басынан ұрған. Осыдан кейін топ Шерзаттың ағасы Нұрғанат Ғайыпбаевқа кіріскен. Оны Шынасыл мен Сакиев пышақтаған. Ғайыпбаев ес-түссіз құлаған кезде, шабуыл жасағандардың барлығы көлікке отырып, кетіп қалған" деді прокурор.

Қылмыстық істе 9 күдікті бар, бірі – кәмелетке толмаған:

• Абзал Шынасыл - “Бұзақылық” (293-бап 3-бөлік), “Адам өлтіру” (99-бап 2-бөлігі), “Адам өлтіруге оқталу” (24-бап);
• Равиль Сакиев - “Бұзақылық” (293-бап 3-бөлік), “Адам өлтіруге оқталу” (24-бап 2-бөлігі)
• Шыңғыс Белғожаев - “Бұзақылық” (293-бап 3-бөлік);
• Дархан Әскентаев - “Бұзақылық” (293-бап 3-бөлік)
• Нұрқияс Ілиясов - “Бұзақылық” (293-бап 3-бөлік)
• Марат Тоқтаубаев - “Бұзақылық” (293-бап 3-бөлік)
• Дидар Қалиахмет - “Бұзақылық” (293-бап 3-бөлік)
• Азамат Тоқтаубаев - 293-бап 3-бөлік.
• Бұдан бөлек, кәмелетке толмаған бір жасөспірімге 434-бап бойынша айып тағылған.

17 сәуір күнгі сотта олардың төртеуі бұрын сотталғаны белгілі болды.

• 16 жастағы Шерзат Полат 2024 жылғы 4 қазанда өзінің отбасы жалға алып отырған Талғардағы дүкен маңында қаза болған. Сатып алушылардың бірімен болған даудың аяғы жанжалға ұласып, ол достарын шақырып, суық қару қолданылған. Салдарынан Шерзат мерт болып, оның немере ағасы жараланған.
• Осы оқиғадан бір апта өткенде қара жамылған отбасының үйі түгі қалмай өртеніп кеткен, ол түні үйде ешкім болмаған, отбасы мүшелері Шерзаттың атасының үйінде ас беруге дайындалып жатқан. Полиция өрт әдейі қойылған деп хабарлап, ауданда күзетті күшейткен. Оған дейін марқұмның туыстары әкімдік алдына жиналып, тергеуді ашық әрі әділ жүргізуді талап еткен. Наурыз айында Қазақстанның бас прокуратурасы Шерзат Полаттың үйін өртегендер әлі табылмағанын айтты.
• Шерзат қаза тапқан оқиға кезінде оның қасында болған, пышақтан жарақат алған немере ағасы Нұрқанат Ғайыпбаев былтыр қараша айында Полаттың отбасы тұратын Азат ауылының сырт жағында өлі табылды. Полиция "ол өзіне қол жұмсаған" деп хабарлады. Бірақ марқұмның жақындары Ғайыпбаевтың "суицид жасағанына" сенбейтінін айтқан.
• Нұрғанат Ғайыпбаевтың жаназасы шығарылған күні Шерзат Полаттың әкесі Қаржаубай Нұрымов қолына пышақ ұстап, жүк көлігінің үстіне шығып алып, ұлы мен інісінің қазаларын әділ тергеуді талап еткен. Осыдан кейін оған "бұзақылық" бабы бойынша айып тағылып, Нұрымов 15 күнге әкімшілік қамауға алынды. Кейін оның үстінен "Өзгенің мүлкін қасақана жою немесе бүлдіру" бабымен қылмыстық іс қозғалғаны белгілі болды. Адвокоттары Нұрымов інісінің жаназасы шығарылған күні полицияның арнаулы жасағы көлігінің дөңгелегін тесіп тастағаны үшін жауапқа тартылған деп хабарлады. Онымен бірге екі туысы 15 күнге қамалып, тағы біреуіне айыппұл салынған.

Дархан Кәлетаев Қазақстанның Украинадағы елшісі қызметінен босатылды. Оның орнына Төлежан Барлыбаев келді. 17 сәуірде тиісті жарлықтар Ақорда сайтында жарияланды.

52 жастағы Дархан Кәлетаев 2020 жылы 22 ақпанда Украинадағы елші болып бекітілген еді. Ол елші болып тұрған тұста 2022 жылы 24 ақпанда Ресей Украинаға басып кірген.

Кәлетаев 2019 жылы наурыз бен желтоқсан айларында президент әкімшілігі жетекшісінің орынбасары болған. Қалетаев бұл қызметке наурыз айында бұрынғы президент Нұрсұлтан Назарбаев отставкаға кетіп, орнына Тоқаев келгеннен кейін тағайындалған. Ол 2018 жылдың шілде айы мен 2019 жылдың ақпан айы аралығында қоғамдық даму министрі болған еді.

Ал 54 жастағы Төлежан Барлыбаев 2022 жылдың наурызынан 2024 жылдың қарашасына дейін Қазақстанның Словакиядағы елшісі болған. Оның алдында да Еуропаның бірқатар елдерінде елші қызметін атқарды. Бұрын президент әкімшілігінде түрлі қызмет істеген.

Шымкенттегі “Жастар ресурстық орталығының” бірнеше қызметкері интернетте белсенділік танытпаған – атап айтқанда, орталықтың желідегі парақшасына лайк баспаған қызметкерлерге басшылық қысым жасап, жазбаша және ауызша ескерту жасалып жатқанын хабарлады. Бұл жөнінде ақпаратты журналист Азат Дидарбек жазды.

“Жастар орталығы қаламыздың жастар мәселесін шешеді дегенге сеніңкіремейтін едік, енді лайк басқан-баспаған қызметкерлерін тізіп, тексеріп, өздері хатта жазғандай тырнақша ішіндегі “ескерту” жасап, жұмыс жасауына кедергі келтіріп жүрсе, оңбайды.. Бүгін (16 сәуір – ред.) осындай қысым көре берген орталық қызметкерінің мазасы қашып, құлап қалып, жедел-жәрдем шақырып, алғашқы медициналық көмекке жүгінуіне тура келді!” деп жазып, жергілікті әкімдіктерді белгілеп, осы мәселеге назар аударуды сұраған.

Азаттық 17 сәуірде аталған орталыққа хабарласқан кезде бір қызметкер телефон көтергенмен сол сәтте байланыс үзілді. Кейін тілші тағы бірнеше рет хабарласып көргенмен ешкім тұтқаны көтерген жоқ.

Qaz365.kz сайты Шымкент қалалық ішкі саясат және жастар істер жөніндегі басқармасының басшысы Айгерім Жұмағұлованың сөзінен түсініктеме келтірді.

“Мен жағдайдың алғашқы жариялануынан бастап хабардармын. Өзіме жұмыс жоспарын белгіледім. Жағдай бойынша шешім әділетті және обьективті түрде қабылданады” деді ол басылымға.

Ресми ақпаратқа қарағанда, жастар ресурстық орталығы – "жастар ұйымдарының қызметіне қолдау көрсететін ұйым". Бүкіл ел аумағында осындай 231 орталық бар деп айтылады.

Сәрсенбі күні Ресейде Курск облысының бұрынғы губернаторы Алексей Смирнов ұсталды. Бұл жөнінде ресейлік БАҚ, оның ішінде "Ведомости", Baza және Mash жазды.

Ресей ІІМ ресми өкілі Ирина Волктің сөзінше, Смирнов Украинамен шекарада бекіністі салу кезінде 1 млрд рубль қаражатқа қатысты алаяқтық жасады деп айыпталған.

Мәскеу соты губернаторды қамауға алуға рұқсат берген.

Ал Смирнов өзіне тағылған айыптарды мойындамаған.

"Ведомости" басылымының жазынша, сәрсенбі күні таңертең Смирновтың үйінде тінту болған. Осы іс бойынша оның бұрынғы бірінші орынбасары Алексей Дедов та ұсталған.

Ақпарат құралдарының жазуынша, бұл қылмыстық іс "Курск облысының даму корпорациясының" бұрынғы бас директоры Владимир Лукинге қарсы қозғалған іске қатысы болуы мүмкін. Ол Ресей-Украина шекарасында бекіністі салу кезінде ірі көлемде қаржы жымқырды деп айыпталған.

2024 жылы тамызда украин күштері Курск облысына басып кіріп, бірқатар аумақты бақылауға алған еді. Украина қарулы күштері әлі де кейбір аумақты бақылауда ұстап отыр.

Смирнов былтыр мамырда Курск облысының губернаторы міндетін атқарушы болған. Украина қарулы күштерінің операциясына қарамастан ол былтыр қыркүйекте губернатор сайлауында жеңіске жетті. Алайда желтоқсан айында отставкаға "өз еркімен" кеткені хабарланған. Оның орнын мемлекеттік дума депутаты Александр Хинштейн басты. Ол тағайындалғаннан кейін бекіністі салу кезінде ақша жымқыру фактілері бойынша қылмыстық істер қозғалған. Тергеу мәліметінше, алаяқтық әрекеттің салдарынан шамамен 800 млн рубль бюджетке шығын келген деп айтылады.

Абай облысында үш адам апатты жағдайдағы аспалы көпірден құлап, қаза болды.
Жергілікті төтенше жағдай департаментінің хабарлауынша, оқиға 15 сәуірде Аягөз ауданы Ақшәулі ауылында болған.

“Алдын ала мәлімет бойынша және куәгерлердің сөзінше, Көкқамыр аумағындағы ағаш аспалы көпірден мотоциклді өткізбек болған шаруа қожалығының үш жұмысшысы Қаракөл өзеніне құлаған. Жағалаудан ұялы телефондар мен сырт киімдер табылды” деп жазылған депатамент хабарламасында.

16 сәуірде құтқарушылар 1980, 1978 және 1967 жылғы үш ер адамның денесін тапқан. Облыстық полиция тергеу жүргізіп жатқаны хабарланды. Сот-медициналық сараптама тағайындалған.

Әлеуметтік желідегі ақпаратқа қарағанда аспалы көпір апатты жағдайда болған. Әзірге жергілікті әкімдіктер оқиғаға түсініктеме берген жоқ.

Былтыр су тасқынынан қатты зардап шеккен Аягөз ауданында бір тәулікте екі адам хабар-ошарсыз кеткен еді. Олар Борлы өзенінен трактормен өтпек болған. Әлеуметтік желіде қолданушылар екі адамның денесі әлі күнге дейін табылмағанын жазды.

"Қаңтар оқиғасы кезінде жаппай тәртіпсіздік ұйымдастырды" деп айыпталып, алты жылға бас бостандығы шектелген Жанболат Мамай өткен аптада қатарынан бес күн тергеуге шақырылған. Бұл жөнінде адвокаты Жанар Балғабаева Азаттық Азияға хабарлады.

Оның сөзінше, Мамай куәгер ретінде бас прокуратураның Алматыдағы өкілдігіне шақырылған.

"Ол куәгер ретінде шақырылды. Бізге белгісіз адамдарға қатысты 179-бап бойынша ("Билікті басып алуды немесе ұстап тұруды насихаттау немесе оған жария түрде шақыру") cотқа дейінгі тергеу амалдары басталған. Бес күн бойы одан [Қаңтар оқиғасы болған күндері] не істегенін егжей-тегжейлі сұрады" деді адвокат.

Азаттық Азияның жазуынша, 2024 жылы қарашада қозғалған істі бас прокуратура жанындағы ведомствоаралық тергеу тобы жүргізеді. Бұл істе қанша күдікті бары және өзге де мәліметтер айтылмайды.

Азаттық Қазақстанның бас прокуратурасына сауал жолдады. Әзірге жауап түспеді.

2023 жылы сәуірде Алматыдағы Бостандық ауданының №2 соты тіркелмеген "Демократиялық партияның" жетекшісі Жанболат Мамайды жалған ақпарат тарату, билік өкілін қорлау және жаппай тәртіпсіздік ұйымдастыру қылмыстарына айыпты деп танып, 6 жылға шартты түрде бостандығынан айырып, сонша мерзімге қоғамдық-саяси қызметпен айналысуына тыйым салған. Былтыр қыркүйекте Жоғарғы сот Жанболат Мамайдың кассациялық шағымын қараудан бас тартты.

Мамай өзіне шыққан үкімнің саяси астары бар деп санайтынын айтқан. Халықаралық ұйымдар оған араша түсіп, Қазақстан билігін тағылған айыптарды алып тастап, белсендіні босатуға үндеген.

Freedom Ticketon сервисі қарайтын Freedom Holding-тің басшысы Тимур Турлов Дженнифер Лопестің Астанадағы концертіне билет сатуда не себепті ақау болғанын түсіндірді.

Турловтың түсіндіруінше, Ticketon комиссия үшін билеттерді тарататын агент ретінде таңдалған. Концертке сұраныс көп болғандықтан билеттерді сату кезінде сайт салмақты көтере алмай, істен шыққан. Техникалық ақаудың нәтижесінде көптеген орындар қайталанып сатылып кеткен. Кейін бұл белгілі болған кезде сатылым тоқтатылған.

Турлов өз жазбасында барлықтарына сервистік жарнаны қайтарып беруге уәде берген. Оның сөзінше, "сатылып кеткен орындарды" сатып алғандарға және бағасы жағынан одан да нашар балама ұсынылғандарға Ticketon өз есебінен ұйымдастырушылардан билет сатып алып, ақшаларын қайтарады. Олар концертке тегін бара алады. Бұған қоса орындары ауысып, қымбатырақ билет ұсынылғандарға билет бағасындағы айырмашылықты компания төлеп бермек. Балама орын таба алмаған және ваучер берілмеген азаматтар билеттің бағасын қайтара алады деді Турлов.

"Осының салдарынан бізге бірнеше жүз миллион теңге шығын келеді. Бұл шешім сервистің бір жылдық табысымен пара-пар және біздің команда оған лайықты екеніне сенімдімін. Техникалық есептер туралы кейінірек жазамыз. Ендігәрі мұндай концерттер қандай техникалық мәселе туындататынын білетін боламыз" деді кәсіпкер.

Сәуір басында үкімет отырысы кезінде 1 тамызда Астанада америкалық әнші Дженнифер Лопестің концерті өтетіні, соған орай сырттан 15 мың турист келетіні және қаладағы қонақүй, мейрамхана, тамақтану желілеріне 6,5 млрд теңге кіріс және бюджетке 400 млн теңге көлемінде тікелей салық түсетіні айтылған еді.

Дженнифер Лопес Қазақстанда бұған дейін кемінде екі рет болған. 2010 жылы ол экс-президенттің кіші қызы Әлия Назарбаеваның туған күнінде ән айтқан. Екінші рет жаңа жылдық кешке қатысқан деп айтылады. Дженнифер Лопес 2013 жылы Түркіменстан басшысы Гурбангулы Бердімұхамедовтің туған күнінде өнер көрсетіп, құқық қорғаушылардың сынына қалған еді.

Өскемен сотында "Бипэк Авто – Азия Авто" компаниялар тобының бұрынғы басшылары Анатолий Балушкин мен Ерік Сағымбаевқа сырттай үкім оқылды. Екеуі алаяқтық және салықтан жалтару баптары бойынша кінәлі деп танылып, Балушкин – 9 жыл түрме, Сағымбаев 8 жыл 6 айға бас бостандығынан айырылды деп жазды жергілікті БАҚ.

Балушкинге 190-бап ("Алаяқтық") 4-бөлік 2-тармағы бойынша айып тағылған. 9 жыл түрме жазасынан бөлек, ол 10 жыл коммерциялық ұйымдарда басшылық қызметін атқару құқығынан айырылған. Сағымбаев "Алаяқтық" және "Салықтан жалтару" баптары бойынша кінәлі танылған. Сот үкімі бойынша ол да он жыл коммерциялық ұйымдарда қызмет атқару құқығынан айырылды.

Ақпаратқа қарағанда, 2020 жылы "Бипэк Авто – Азия Авто" холдингі Өскеменде автомобиль зауытын салуы керек болған. Мемлекет 174 миллиард теңге көлемінде салық және кеден жеңілдіктерін беріп, қолдау көрсеткен, алайда холдинг келісімшартты орындамаған деп айтылады. Сол жылдары компания аталған жоба түрлі себептермен жүзеге аспағанын мәлімдеген. Арасында көлік нарығының қысқаруы, теңге бағамының тұрақсыздығы және қаржымен байланысты қиындықтар да бар.

2021 жылдың тамызында Қазақстан билігі "Бипэк Авто — Азия Авто" компаниялар тобы директорлар кеңесінің төрағасы Анатолий Балушкинге іздеу жарияланғанын хабарлаған. Қазақстан соты оны қамауға алу жөнінде сырттай санкция берген. Балушкин мен оның командасы сот шешіміне қарсы бірнеше рет шағым түсірген. "Азия-Авто" екі мыңнан астам қызметкерін таратып, кәсіпорын кейбір бағыттарын жапқан. Балушкин 2020 жылы өткізген баспасөз конференциясында "үш зауытқа да толық тексеріс жүргізіп, кімнің мемлекеттің қандай ақшасын алғанын, қайда қалай салғанын" көргісі келетінін айтқан.

Ресей сыртқы істер министрі Сергей Лавров "Коммерсантъ" басылымына берген сұхбатында Қазақстан президенті Қасым-Жомарт Тоқаевтың территориялық тұтастықты сақтауға басымдық беру қажеттігі туралы тұжырымымен келіспейтінін, БҰҰ Жарғысында ұлттардың өзін-өзі анықтау құқығы да қарастырылғанын айтты.

2022 жылы маусымда Қазақстан президенті Қасым-Жомарт Тоқаев Санкт-Петербург халықаралық экономикалық форумында БҰҰ-ның өзін-өзі анықтау және территориялық тұтастық туралы принциптері қайшылықта екенін, территориялық тұтастықты сақтамау көптеген елдердің жанжалдасуына апаратынын, сол себепті Қазақстан Донецк және Луганск халық республикаларының тәуелсіздігін мойындамайтынын айтқан еді.

"Мен онымен келіспеймін. Біз содан кейін қазақстандық достарымызға өз позициямызды түсіндірдік. Ол [Қазақстан президенті] үшін тек территориялық тұтастық құқығы ғана бар. Қайталап айтамын: егер БҰҰ мүшесі болсаңыз, онда Жарғыны тұтас құрметтеуге тиіссіз" деді Лавров сұхбатта.

Оның айтуынша, "территориялық тұтастық үкіметі сол аумақта тұратын барлық ұлтты білдіретін мемлекеттерде сақталады".

2022 жылы маусымда Қазақстан президенті Қасым-Жомарт Тоқаев Санкт-Петербург экономикалық форумында егер ұлттардың өзін-өзін анықтау құқығы жүзеге асырылса, әлемде 193 мемлекеттің орнына 500 немесе 600 мемлекет болатын еді, яғни хаос болады деп айтқан еді.

"Сол себепті біз Тайвань, Косово, Оңтүстік Осетия, Абхазияны мойындамаймыз. Және бұл принцип біздің ойымызша, Луганск және Донецк сияқты квазимемлекеттік аумақтарға да қолданылады" деді Тоқаев.

2022 жылы ақпанда Ресей Украинаға басып кірерден бірнеше күн бұрын Владимир Путин Донецк халық республикасы мен Луганск халық республикаларының тәуелсіздігін мойындау туралы шешім шығарған. Халықаралық қауымдастық Украинаның шығысында өзін республика жариялап алған ДХР мен ЛХР-дың тәуелсіздігін мойындамаған.

Украинаны атқылап жатқан Ресей әскері қолданатын артиллериялардың 50-100 пайызы Солтүстік Кореядан әкелінген. Бұл жөнінде Reuters агенттігі мен британдық Open Source Centre ұйымының ортақ зерттеуіне сүйенген "Важные истории" жазды.

Солтүстік Корея Ресейге 2023 жылдың қыркүйегінен бастап қару-жарақ жеткізе бастаған. Оның алдында шілдеде сол кездегі Ресей қорғаныс министрі Сергей Шойгу Пхеньянға барған. Украина бас барлау басқармасының мәліметінше, пакет құрамында дүркіндете ататын 120 жүйе, өздігімен жүретін 120 артиллериялық қондырғы, 145 баллистикалық ракета мен 122 мм және 152 мм калибрлі артиллериялық снарядтар бар. Reuters мұны "Ресейге жеткізілген қомақты тіке әскери көмек" деп атайды.

2023 жылдың қыркүйегі мен 2025 жылдың 17 наурызына дейін ресейлік «Ангара», «Мария», «Майя-1» және «Леди Р» жүк кемелері Солтүстік Кореяның Раджин портынан ресейлік Дунай және "Восточный" порттарына 64 рет әскери жүк жеткізген. Спутник деректеріне сүйенсек, онда кемінде 15 809 контейнер болған. Бұған қоса, Солтүстік Корея жүгі Приморьедегі Туманная өзені арқылы "Достық" көпірімен тасымалданған.

Ең көп тауар жеткізу 2024 жылы қаңтарда тіркелген: айына жеті партия. Қазір жүк кемелері айына шамамен үш партиядан снарядтар жіберіп жатыр.

Сарапшылардың бағалауынша, 4-6 миллионға дейін артиллериялық снаряд контейнерлермен тасымалданған болуы мүмкін. Батыс және украин шенеуніктерінің мәліметінше, 2024 жылы Ресей 2–2,3 млн снаряд шығарған және алдағы уақытта 3 миллионға дейін арттыруды жоспарлап отыр.

Снарядтар теміржол арқылы Ресей мен Украина шекарасына жақын қоймаларға, негізінен Тихорецк қаласына тасымалданады.

Украина бас барлау басқармасының мәліметінше, Ресей әскері соғыста қолданған снарядтардың 50 пайызын Пхеньян қамтамасыз етеді. Журналистердің қолына түскен Ресей қорғаныс министрлігінің ішкі құжаттарында Ресей әскерінің кейбір бөлімдері қолданған артиллериялық снарядтардың 75-100 пайызы Солтүстік Кореяда жасалғаны жазылған.

2023 жылы екі жақта да артиллериялық снарядтар қоры таусылып, Украина батыс одақтастарынан дер кезінде қолдау таба алмаған еді: ЕО-ның снаряд өндірісі мұндай салмаққа шыдай алмайды. Әскери сарапшы Конрад Музыканың пікірінше, 2023 жылдың соңынан бері Ресей қарулы күштері "Солтүстік Кореяның арқасында ғана" Украинаны үзіліссіз атқылай алған. 2024 жылдың сәуірінде Владимир Зеленский тараптардың қару-жарақ теңсіздігі туралы айтып, Украина қарулы күштері қолданған әрбір снарядқа 10 ресейлік снаряд келетінін мәлімдеген.

2023 жылдың соңынан бері Ресей Украина қалаларына солтүстіккореялық KN-23 және KN-24 баллистикалық ракеталарымен соққы жасап келеді. Бастапқыда бұл ракеталардың дәлдігі төмен болатын. Кейінгі кездері Солтүстік Корея шығарған ракеталар көздеген нысанасынан 50-100 метр аулаққа түсіп жатыр.