Езгулик адам хұқтары тобының төрағасы Изроил Ризаев Ассошайтед пресс агенттігіне берген сұхбатында өз орынбасары Карим Бозорбаевтың Өзбекстан Конституциясының 15 жылдығының тойлануына орай жарияланған рақымшылық бойынша босатылғандығын айтқан. Адам хұқтарының белсендісі алаяқтығы үшін деген айыппен осыдан бір ай бұрын алты жылға түрме жазасына кесілген болатын. 2005 жылы Әндіжан қаласында болған қанды толқулардан бері қарай Өзбекстанда кемінде 15-ке жуық адам хұқтарының белсендісі түрлі айыптармен абақтыға қамалған, ал кейбіреуі психиатриялық ауруханаларға жатқызылған.

Белсенді Әлнұр Илияшев Балқаш маңына салынайын деп отырған АЭС орны Ресей жалға алып отырған әскери полигон Сарышағаннан небәрі 22 шақырым жерде орналасқанын, ал бұл қауіпсіздік талаптарына сәйкес еместігін атап өтіп, үкіметті сотқа берді. Халықаралық нормаға сәйкес, АЭС әскери нысандардан кемінде 30 шақырым алшақ орналасуы керек.

Белсенді "Гиперборей" арнасына берген сұхбатында маңына атом станциясы салынайын деп отырған Үлкен ауылдық округы мен полигонның шекарасы арасы небәрі 22 шақырым екенін, ал бұл қауіпті екенін айтады. Аталған полигонда ракетаның өзге түрлерімен қатар кемінде мың шақырымға ұшатын құрлықаралық баллистикалық ракеталар да сынақтан өтеді және екі елдің келісімінде де ракета бөлшектері полигон аумағынан тыс жерге құлауы мүмкін екен де жазылған.

"Бұл өте қауіпті. Мен арнайы сервистердің көмегімен 2000 жылдары ратификацияланған келісімде бекітілген шекараларды алып қарадым. Осылайша екі нысан арасындағы қашықтық небәрі 22 шақырым екенін анықтадым. Яғни, Үлкен ауылдық округы мен полигон шекарасына дейінгі аралық. Оның үстіне бізде бұл келісім он жыл сайын ұзартылады. Қазір [кемінде] 2030 жылға дейін полигон істейтіні белгілі" деді Әлнұр Илияшев арнаға.

Белсендінің шағымын 21 мамырда Астананың азаматтық істер жөніндегі ауданаралық соты тіркеген.

Қазақстан үкіметі әзірге белсендінің шағымына реакция білдірмеді.

"Атом электр станциясы" ядролық қондырғысы салынатын аудан туралы қаулыға былтыр 30 желтоқсанда қол қойылған. Оған сәйкес, елдегі бірінші атом электр станциясы салынатын орын ретінде Алматы облысындағы Жамбыл ауданын ресми түрде бекітілген. АЭС салуға қолайлы орын деп айтылып жүрген Балқаш көлі жағалауындағы Үлкен ауылы осы өңірге қарайды.

Белсенді Әлнұр Илияшев соттан осы қаулыны заңсыз деп тануды сұрап отыр.

Қазақстанда АЭС салу туралы жалпыхалықтық референдум былтыр 6 қазанда өтті. Байқаушылар референдумға дауыс беру кезінде заң талаптарын бұзу фактілері тіркелгенін, мысалы, референдум бюллетеньдерін дауыс беру жәшігіне топтап тастау секілді жайттар анықталғанын хабарлаған.

Орталық референдум комиссиясының ресми қорытындысына сай, дауыс берген азаматтардың 71 пайызы Қазақстанда АЭС салуды қолдаған. Президент Тоқаев АЭС-ті халықаралық консорциум салуы керек деп мәлімдеген.

Экологтардың көбі елде АЭС салуға қарсы. Олар атом электр станциясын салуға қолайлы орын деп айтылып жүрген аймақтағы Балқаш көліне АЭС кері әсер етеді деп есептейді. АЭС салуды жақтаушылар негізінен энергия тапшылығын алға тартады. Қоғам белсенділері мен саясаттанушылар АЭС-ті Ресей салатын болса, Қазақстан оған энергия жағынан тәуелді болып қалады деп алаңдайды.

24 мамырға қараған түні Ресей әскері 14 баллистикалық ракета ("Искандер-М"/KN-23) және 250 Shahed және өзге де дрон түрлерімен Украина аумағына ірі соққы жасады. Бұл жөнінде Украина қарулы күштері хабарлады.

Украина әскерінің хабарлауынша, ракеталар Ресейдің Брянск облысы, Таганрог, Ейскі аумақтарынан, сонымен бірге оккупацияланған Қырымнан ұшырылған. Шабуылдың негізгі мақсаты тағы Киев болғаны хабарланды.

"Сағат 8:30-дағы жағдай бойынша әуе шабуылына қарсы күштері Киевке қарсы бағытталған алты ракетаны атып түсірді. Бұдан бөлек, қарсы жақтың 245 дроны жойылды: 128 оқпен, 117 істен шығарылды" деп жазылған Украина қарулы күштерінің хабарламасында. Полицияның мәліметінше, Киевте кемінде 15 адам зардап шеккен.

Ресейдің жаппай шабуылы 23 мамырда сағат түнгі ондарда басталған. Киев, Черкасск, Кировоград, Николаев, Днепропетровск, Запорожье, Полтава, Харьков, Чернигов, Сумы, Донецк және Луганск облыстарында әуе дабылы іске қосылды.

Ресей Украина аумағын ракета, дрон-камикадзе, әуе бомбалары мен артиллериямен атқылап жатыр. Кремльдің "соққы тек әскери нысандарға ғана жасалып жатыр" деген мәлімдемесіне қарамастан Украина билігі мен халықаралық құқық қорғау ұйымдары көптеген тұрғын үй, мектеп, аурухана. энергетика және сумен жабдықтау нысандарына соққы жасалғанын тіркеген.

Мұндай әрекеттер әскери қылмыс санатына жатқызылып, бейбіт халыққа бағытталған шабуыл ретінде бағаланады.

Дархан Сатыбалды Алматы қаласының әкімі болып тағайындалды. Тиісті жарлық Ақорда сайтында жарияланды.

51 жастағы Дархан Сатыбалды бұған дейін президент әкімшілігі жетекшісінің бірінші орынбасары болған.

Биыл қаңтарда Ақорда "президенттің тапсырмалары мен шешімдерінің ауыл-аймақтарда орындалу барысын бақылауды күшейту, қабылданған іс-шаралардың сапасын жақсарту әрі азаматтардың мемлекеттік институттарға сенімін нығайту мақсатында" осындай қызмет (президент әкімшілігі жетекшісінің бірінші орынбасары)қайта енгізілгенін айтқан.

2025 жылдың қаңтарына дейін Дархан Сатыбалды 2022 жылдың тамызынан бері Түркістан облысын басқарған. 2022 жылы желтоқсанда бұл қызметке қайта тағайындалды.

Оған дейін 2019 жылдың наурызынан бері Қазақстанның Өзбекстандағы елшісі болған. Әр жылдары Оңтүстік Қазақстан облысы әкімінің бірінші орынбасары, Шымкент қаласының әкімі, ұлттық қауіпсіздік комитетінің департамент басшысы болған, сенат депутаты болып сайланған.

Алматы қаласын 2022 жылдан бері басқарған Ерболат Досаев 24 мамырда президент жарлығымен бұл қызметтен босатылды.

Ресей әскері Украинаға қарсы соғыста кемінде 109 625 адамынан айырылған. 9 мамырдан бері екі апта ішінде қаза болғандардың тізіміне тағы 2009 адам қосылған. Қаза болғандардың тізімін "Медиазона" мен BBC-дің Орыс қызметі еріктілердің көмегімен жүргізіп жатыр.

Ресей Украинадағы соғыста қанша адамын жоғалтқанын айтпайды. Бұл ақпарат құпия саналады. Журналистер ашық дереккөздер мен мемлекеттік базадағы жанама ақпараттардың негізінде тізімді жасап жатыр. Мұндай мониторингке қаза болғандардың барлығы ілінеді деп айту қиын.

"Медиазона" жаңа есебінде жариялаған ақпаратты әскери әндер айтатын әнші Вика Цыганова өзінің телеграм-арнасында жариялады. Ол Мәскеу түбіндегі Мышецкое ауылындағы зиратқа барып, сонда жаңа жерленген 33 қабірді анықтаған.

"Медиазона" сол зиратта жерленгендерді тізімге енгізді.

Журналистер мен еріктілер әдетте статистиканы әлеуметтік желі, некрологтар мен өзге де ашық дереккөздерден жинайды.

Мышецкое ауылындағы зират 2024 жылдың қараша айынан бері жиі қолданыла бастаған: онда қаза болғандардың 23-і былтыр 1 қарашадан кейін опат болған.

Тізімдегілердің төрттен бірі - еріктілер. Олардың саны 27 мыңнан асады. 16 пайызы – тұтқындар (17 мыңнан астам адам). 11 пайызы (12 мыңнан астамы) – мобилизацияланғандар.

Ерболат Досаев Қазақстан президентінің жарлығымен Алматы қаласының әкімі қызметінен босатылды. 24 мамырда таңертең Ақорда сайтында тиісті жарлық жарияланды. Досаевтың қызметтен кету себебі айтылмайды.

55 жастағы Ерболат Досаев Қанды Қаңтардан кейін Алматы әкімі болып тағайындалған.

Ол мемлекеттік қызметке 1990 жылдардың соңында келді. Үкімет пен қаржы секторында ірі лауазымды қызметтерді атқарды. Денсаулық сақтау, экономикалық даму, ұлттық экономика министрліктеріне жетекшілік етті. Әкім қызметіне тағайындалғанға дейін үш жыл ұлттық банктің төрағасы болды. 2006-2012 жылдары аралығында бизнеспен айналысқан. 2014 жылы қазақстандық Forbes журналы оны елдегі ең дәулетті 50 кәсіпкер қатарына енгізген.

23 мамырда кешке жергілікті мәслихат хабарламасына сүйенген БАҚ жаңа әкім бүгін тағайындалатынын жазған еді.

23 мамырда Талдықорғанда Шерзат Полаттың өліміне қатысты сотта сот медицина сарапшылары Мұхит Көшеров пен Тахир Халимназаровтан жауап алынды.

Сот кезінде сарапшы Мұхит Көшеров Шерзат Полаттың қазасына кеуде тұсындағы пышақ жарақаты, сол жақ өкпенің зақымдануы және өкпеқап қуысында қанның жиналуы себеп болғанын айтты.

"Дер кезінде көмек көрсетілмесе, көбіне мұндай жарақат өлімге алып келеді. Егер мына жағдайда арнайы жедел медициналық көмек, хирургиялық араласу, қанды тоқтату және жоғалған қан көлемін құйып, толықтырғанда аман алып қалуға болатын еді" деді Мұхит Көшеров.

Ол сонымен бірге Шерзаттың көзінің асты көгергенін және сырылған айтты. Марқұмның саусақтары мен сол жақ сирағында да сызат болған. Желкесі қанталаған.

Бұдан кейін тәуелсіз сарапшы Тахир Халимназаров жауап берді. Ол бір жыл бұрын Салтанат Нүкенованың өлімі бойынша істе сарапшы болған. Ол да Шерзаттың өліміне көп қан жоғалтуы себеп болғанын айтты.

"Мәйітті зерттеген кезде кеуде қуысында 1,5 литр бос қан анықталды. Көп мөлшерде. Өйткені қан тез жоғалтқан кезде 500-600 миллилитрдан кейін адамның жағдайы ауырлай түседі. Бір литр қан тез кетіп қалса, сол кезде адам есінен танып, ауыр жағдайда болады...Бір литрға дейін қан кеткенге дейін көмек көрсетілгенде онда оны аман алып қалуға болар еді" деді Тахир Халимназаров.

23 мамырда Алматыда Қаңтар оқиғасы кезінде асыраушысынан, жақындарынан айырылған 11 адам әкімдікке жиналды. Олар әкімдіктен Қаңтар оқиғасында оқ тиіп, қаза болған Еркебұлан Сыдықбаевтың балаларын балабақшаға орналастыруды сұрады. Марқұмның әйелі, кәмелетке толмаған төрт баланың анасы Сая Есенгелді де биыл ақпанда жол апатынан қаза болған еді. Қаңтарда асыраушысынан айырылған әйелдер әкімдіктен баспана да сұрай келді.

"Төрт бала үлкен кісінің қолында қалды. Ол кісі онсыз да стресс алып отырған адам. Не медициналық көмек жоқ, не балабақшадан көмек жоқ. Саяның өліміне де егер үкімет атып өлтіріп тастамаса, Сая да көшеге шығып, машина айдап, қайтыс болмас еді ғой. Енді соның тіпті ең негізгі заттарға, балабақшаға көмектеспесе, мамасының медицинасына көмектеспесе, онда білмеймін, үкіміттен не күтеміз, не үміт, не қайыр" деді Тұрар Арыстанқұловтың жесірі Әлия Сәкенқызы.

Жиналғандар ақпарат құралдарына кезек-кезек шағымдарын айтты. Олар Қаңтар кезінде жазықтан-жазықсыз өлтірілгендердің отбасына мемлекет қолдау жасау қажеттігін атап өтті.

"Сіздің күйеуіңіз - кінәсіз, жәбірленуші, бірақ атқан адам табылмағандықтан, үкімет кінәсіз дейді. Ол қалай кінәсіз? 20 мың террорист кірді дегені рас па? Рас. .... Оны өтірік ақпарат деді. Сол өтірік ақпараттың салдарынан біздің балаларымыз әкесіз қалып отыр, біз күйеусіз, асыраушысыз қалдық. Үйсіз-күйсіз жүрміз, айналып келіп, 7 миллионды айта береді. Ол өтемақы емес, ол бір реттік көмек. 70 миллион берсін, сосын көзіме шұқып тұрып айтсын. Менің күйеуім өз өлімімен, ауырып өлсе, немесе ажалы жетіп, апатқа тап болса, мен келмес едім" деді Әкімжан Бектұрғанның жесірі Шапағат Кадирова.

Әкімдік алдына жиналған өзге әйелдер де тұрмыс тауқыметі туралы айтып, мемлекет өз азаматтарына көмектесуі керек деді.

Жиналғандарды Алматы әкімдігіне қарасты қоғамдық даму басқармасы басшысының орынбасары Бақдәулет Сариев қабылдады. Алайда жиналғандар одан мардымды жауап естімегенін айтты.

Азаттық Сариевтің өзімен сөйлеспекші болды, бірақ ол жиналысқа кіріп кеткенін айтты.

Мемлекет Қанды Қаңтарда кездейсоқ қаза болған жиыны 151 адамның отбасына 7 миллион теңгеден қайырымдылық көмек берген. Олардың кәмелетке толмаған әр баласына 2 миллион теңгеден берілген. Бұл ақша - Қазақстан президенті Қасым-Жомарт Тоқаевтың бастамасымен құрылған "Қазақстан халқына" қорының атынан берілді. Қорға ауқатты кәсіпкерлер, ірі компаниялар ақша аударды.

Өткен аптада Қаңтар оқиғасы кезінде жақындарынан айырылған бірнеше адам бас прокуратура алдына жиналып, үкіметтен баспана мәселелерін шешіп беруді сұраған. Кәмелет жасына толмаған балаларын қарап, жұмысқа шыға алмағанын айтқан кейбір әйелдер асыраушысынан айырылған отбасына берілетін жәрдемақыдан өзге табыс көзі болмағандықтан күн көрісі ауырлағанын айтқан.

Президент Қасым-Жомарт Тоқаев "елге мыңдаған террорист шабуыл жасады" деп мәлімдеп, күш құрылымдарына ескертусіз оқ атуға бұйрық берген 2022 жылғы Қаңтар оқиғасы кезінде Қазақстанда, ресми мәлімет бойынша, 238 адам қаза тапқан. Оның жартысынан көбі Алматыда мерт болды. Билік елге сырттан әлдебір террор тобы шабуылдағанына ешқандай айғақ-дәлел келтірмеді.

Қаңтарда адамдарға оқ атқандардың дені анықталған жоқ, кісі өлімі фактісі бойынша қозғалған істердің көбі жабылып қалды. Кейін бірнеше әскери қызметші "адам өлтіру" айыбымен емес, "қызметін асыра пайдалану" бабы бойынша жауапқа тартылды.

22 мамырда Қарағанды соты “бейбіт жиын өткізу тәртібін бұзды” деп айыпталған белсенді Бақытжан Жансейітовті 15 тәулікке қамады. Сот шешімінде жауапкер “31 мамырда Қарағандының орталық саябағында саяси қуғын-сүргін құрбандарын еске алуға арналған шеруге қатысуға үгіттеген” деп жазылған. Жансейітов тағылған айыпты мойындамаған және өзінің аккаунты бұзылғанын айтқан.

Кеше, 22 мамырда ұсталған тағы бір белсенді Болатбек Тоқмырзаның соты Қарағандыда бүгін өтуі тиіс. Жақындарының сөзінше, оларға соттың уақытын айтпай отыр. Оны да полиция кеше жұмыс орнынан ұстап әкеткен.

Қарағанды тұрғыны Ерлан Кенешбаевтың сөзінше, Азамат есімді тағы бір белсенді ұсталған. Ол жөнінде әзірге ақпарат анықталып жатыр.

Кенешбаевтың сөзінше, бүгін, 23 мамырда қалада белсенділер жиналып, саяси тұтқындарды босату, Қытаймен визасыз режимді алып тастау, жер қойнауын қазуды тоқтату сияқты түрлі талаптарды талқыламақ болған. Алайда осы жиын қарсаңында "белсенділер қудаланып, басқа өңірден келуі керек азаматтар да Қарағандыға жете алмаған".

Ал Қарағанды соты ақпарат құралдарына жауапкер шақырған шараға әкімдік рұқсат бермегенін айтты.

"Сот жағдайды жеңілдететін жайттарды ескерді, алайда ер адам бұрын осы бап бойынша жауапқа тартылғандықтан ол 15 тәулікке қамалды" деп хабарлады сот өкілдері.

Қарағанды полициясы әзірге белсенділердің ұсталуына түсініктеме бермеді. Қарағанды қалалық полиция департаментінің баспасөз хатшысы Бақытжан Құдияров Азаттық тілшісі қоңырау шалған кезде басып тастады.

Бұған дейін Астана, Өскемен, Семей, Орал, Павлодар және өзге де қалалардағы бірқатар белсенділер жергілікті билік саяси қуғын-сүргін құрбандарын еске алу күні митинг өткізуге рұқсат бермегенін айтқан еді. Олардың айтуынша, жергілікті билік көп жағдайда орынның бос еместігін, өтініштердің дұрыс толтырылмағанын айтқан. Бір күн бұрын Орал қалалық әкімдігі Азаттыққа жергілікті белсенді берген өтініште бірізділік жоғын айтқан еді.

Актер, стэндап-комик Әнуар Нұрпейісов 23 мамырға жоспарланған Астанадағы концерті өтпейтінін мәлімдеді.

Оның сөзінше, екі орын да концерт өткізе алмайтындықтарын айтқан. Бірі “техникалық жұмыстарды” алға тартса (ол мәселе комиктің позициясында болып отырғанын мойындаған), екіншісі ҰҚК-дан хабарласып, концертті өткізуден бас тартуға мәжбүрлегенін айтқан.

“Маған кедергі жасағысы келетін адамдарға қайырылғым келеді. Мені кинематографтардың қара тізіміне енгізгендеріңді білемін. Менімен жұмыс істегісі келетін жарнама берушілер салдарынан қорқады. Стендап комедия - бұл менің жалғыз шығармашылық табыс көзім. Сіздер мені тұншықтырып жатсыздар. Бұл – жаман нәрсе, төмен деңгей. Бұл бізді өркениетті елдер қатарына жақындатпайды. Сіздер адам ресурсын ысырап қылмас үшін қанша талантты адам Қазақстаннан кетуі керек? Еркін шығармашылықпен айналысу үшін не істеуім керек? Сахнаға жүгіріп шығып “президент тигр” деуім керек пе? Сіздер соны жақсы көресіздер ғой...” деді Әнуар Нұрпейісов видеомәлімдемеде.

Әнуар Нұрпейісов өзінің парақшаларында басқарушы партия өкілдерін сынап, биліктің әрекеттерін әзілге қосқан. Ол былтыр желтоқсанда да Астанада концерт өткізетін орын иелеріне қоқан-лоқы жасалғанын айтып, кешін өткізе алмаған еді.

ҰҚК-нің баспасөз қызметі әзірге оқиғаға түсініктеме бермеді.

Бұған дейін Қазақстаннан кеткен режиссер Ермек Тұрсынов та мамырдың соңына жоспарланған кештерін шегеруге мәжбүр болғанын айтқан еді.

22 мамырда ол Нұрлан Сабыровпен "Диалог" атты кеш, 31 мамырда Еркеш Шәкеевпен бірігіп саяси қуғын-сүргін құрбандарына арналған шара өткізбек болған. Almaty Theatre өкілдері оған техникалық себептерді алға тартып, 31 күнгі шараны өткізе алмайтынын ескерткен. Бұған дейін мұны композитор Еркеш Шәкеев те айтқан.

АҚШ үкіметі Гарвард университетіне шетел студенттерін қабылдауға тыйым салды. Бұған қоса, президент Дональд Трамптың әкімшілігі қазіргі студенттерді басқа оқу орындарына ауысуға мәжбүрлеп жатыр, өйпеген жағдайда олар елде заңды тұру құқығынан айырылады. Бұл туралы бейсенбі күні ұлттық қауіпсіздік министрлігі хабарлады.

Ұлттық қауіпсіздік министрі Кристи Ноэм Гарвард университетінің студент алмасу бағдарламасын "зорлық-зомбылықты, антисемитизмге дем береді және Қытай коммунистік партиясымен байланысы бар" деп айыптап, аталған бағдарлама бойынша сертификат беруді тоқтатты.

Университет бұған дейін министрлікке кейбір шетел студенттері туралы мәлімет беруден бас тартқан.

«Университеттердің халықаралық студенттерді қабылдап, қымбат оқу ақысы арқылы миллиардтаған долларлық қорын толықтыру бұл құқық емес –артықшылық», - деді Ноем.

Гарвард басшылығы мыңдаған студентке қатысы бар Трамп әкімшілігінің әрекетін заңсыз және кек алу талпынысы деп атады. Бұл жоғары оқу орнының академиялық және зерттеу миссиясына нұқсан келтіретінін де айтты. Университет зардап шеккен студенттерді қолдауға уәде берді.

2024-2025 жылы Гарвард 6800 шетел студентін қабылдаған, бұл оқу орны қабылдаған студенттердің 27 пайызы деп жазды Reuters.

Президент-республикашыл Дональд Трамп бүкіл елдегі жеке колледждер мен мектептерді Америкаға қарсы, марксистік және радикалды солшыл идеологияны насихаттайды деп айыптап, жүйені қайта өзгертуге тырысып жатыр. Трамп Гарвардты профессорлық-оқытушылық құрамға немесе басшылық лауазымдарға танымал демократтарды жалдағаны үшін сынады.

Сәуір айында Трамп әкімшілігі Гарвард университетін азаматтық құқықтар туралы заңды бұзды және антисемитизммен тиісті дәрежеде күреспей отыр деп айыптап, 2,2 миллиард доллар көлемінде федералдық қаржыландыруды тоқтататынын мәлімдеген. Ақ үй сонымен қатар Колумбия университетіне 400 миллион долларға жуық қаржы беруді де тоқтатты. Мұндай қадам 2023 жылы Израиль мен Газадағы оқиғалардан кейін Американың оқу орындарындағы палестиналық студенттерді жақтаған наразылық толқынына жауап ретінде жасалды.

Алматыда көп қабатты үйден құлап, қаза болған 22 жастағы Ақнәр Гүлістанның анасы Қазақстан президенті Қасым-Жомарт Тоқаевқа қайырылды. Видеомәлімдеме Instagram-дағы Justice_for_aqnar парақшасында жарияланды.

Ақнәрдің анасы Гүлістан Қамиттің айтуынша, дәлелдер мен видеоматериалдар қызының бұл әрекетке өз еркімен бармағанын көрсеткен.

"Денесінде азаптаудың ауыр іздері болды. Телефонынан табылған видеоларда қызымды ұрып-соғып, қорлап жатқан сәттер бейнеленген. Қауіпсіздік камераларынан алынған жазбаларда оны терезеден лақтырып жібергені, оқиғадан кейін қызымның барлық мүлкі, ақшасы, заттары тіпті киімдері де жоқ болып шықты. Оның жанында болған екі қыз Қытай халық республикасының азаматтары (аттарын атайды – ред.) осы қылмысқа тікелей қатысы болуы мүмкін. Соған қарамастан олар бостандықта жүр. Бірі тіпті елден шығып, қайта оралды. Енді бірі 2025 жылдың 25 қаңтарында Қазақстан азаматтығын алды. Тергеп тексеру амалдары барысында ешқандай бұлтартпас шарасы қолданылған жоқ. Алматы қалалық тергеу органы мен прокуратурасы бұл істі жеңіл баппен - "өзіне-өзі қол жұмсауға итермелеу" деп бағалап, шынайы тергеу жүргізбей отыр" деді марқұмның анасы.

Ол президенттен қылмыстық істің бабын ауыстырып, "адам өлтіру" және "заңсыз бостандықтан айыру" баптары бойынша қарастыру туралы бұйрық беруді өтінді. Марқұмның анасы Алматының тергеу органдарына сенбегендіктен істі Астананың арнайы тергеу органдарының бақылауына беруді өтінді. Бұған қоса, Ақнәрдің өліміне қатысты бар күдіктілерді қамауды және тергеуді әділ жүргізуді сұрады.

"Мен тек қызым үшін емес, барлық ана мен болашақ ұрпақ үшін әділет сұрап отырмын. Қызымның өмірі жәй ғана сан қатарында жазылған статистика болмауы керек. Ол тірі жан еді. Арманы бар, болашағы бар сүйікті балам еді. Сол баламның әділдікке лайық екенін дәлелдеуге көмектесуіңді сұраймын" деді Гүлістан Қамит.

2024 жылы 20 шілдеде Алматыда 22 жастағы студент Ақнәр Гүлістан көп қабатты тұрғын үйден құлап мерт болған. Полиция "өзін өлтіруге итермелеу" бабы бойынша қылмыстық іс қозғаған. Марқұмның туыстары оны азаптап, терезеден құлатып жіберген деп санайды. Марқұмның анасы баспасөз жиынында және Азаттыққа берген сұхбатында қызының денесінен соққы іздері табылғанын, тырнақтары мен шаштары жұлынғаны анықталғанын айтқан. Ол сонымен біре соны дәлелдейтін видео-фото материалдар берген. Марқұмның отбасы істі "Адам өлтіру" және "Азаптау" баптары бойынша тергеуді және кінәлілерді жауапқа тартуды талап етіп отыр.

Ақнәр Гүлістан - Алматыдағы КИМЭП университетінің түлегі. Анасының сөзінше, ол бес тілде еркін сөйлеген, арман-мақсаты бар қыз болған.

Солтүстік Кореяның солтүстік-шығысындағы Чхонджин қаласында кеме жасау зауытында суға түсіру рәсімі кезінде жаңа эсминец тесіліп, аударылды. Оқиға елдің басшысы Ким Чен Ынның көзінше болды.

Кореяның орталық телеграф агенттігінің мәліметінше, оқиға 21 мамырда болған. Кемені тасуы тиіс болған арба қатар жылжымай, соның салдарынан түсіру құрылғысы жолдан ерте шығып, кеме тесіліп, оның тұмсығы жолда қалған.

Ким оқиғаны "жауапсыздық пен ғылыми емес тәжірибеден туындаған қылмыс" және "мемлекеттің беделіне нұқсан келтіру" деп атады. Оның сөзінен Кореяның орталық телеграф агенттігі үзінді келтіреді.

Оқиға еңбек партиясының орталық комитетінің пленумында қаралмақ. Ким кемені маусымға дейін қалпына келтіруді талап етті. Қазір эсминец портта аударылып жатыр деп хабарлады Оңтүстік Кореяның біріккен қолбасшылығы.

Жаңа құрастырылған эсминец туралы ашық дерек өте аз. Солтүстік Корея оның атын да атамады. Оның сыйымдылығы – 5 мың тонна деп айтылады. Егер оны қалпына келтірсе, ол Солтүстік Корея флотындағы ең ірі екі кеменің бірі болмақ.

• Аталған эсминец кеменің "Чхве Хён" түріне жатады. Жаңа үлгідегі бас кеме сәуір айында суға түсірілген. Жарияланған суреттерге қарағанда, бірінші кемеде үш түрлі 74 зымыранға арналған қондырғы жүйелері, бір 100-130 мм артиллериялық қондырғы, екі алты ұңғылы 30 мм артиллериялық қондырғы, зениттік-зымырандық және артиллериялық жүйе және болжам бойынша, қиғаш қондырғылары бар деп жазды imp-navigator блогы.

Ауыл шаруашылығы министрлігін (АШ) сынап жүрген сарапшы Кирилл Павлов әлеуметтік желі парақшаларында егіс алқаптарына қатер төндіріп жатқан шегірткелер туралы бірнеше пост жазған. Осыдан кейін сарапшы өзіне қарсы "Жалған ақпарат тарату" (456-2, 3-бөлік) бабы бойынша хаттама толтырылып, сотқа шақырылғанын хабарлады.

Оның соты 22 мамырда таңертең өтуі тиіс болған, алайда өтпей қалған.

Кирилл Павлов өзінің жазбаларында АШ министрлігі Қазақстан бойынша 2,1 млн га жер шегірткеден зардап шеккенін айтқанмен бір ғана Жамбыл облысында азиялық шегірткенің таралу аумағы 2.6 млн га жететінін жазған.

"Және бұл кофеге қарап жасалған жорамал емес – ұзақ уақыт бойы жүргізілген бақылаулар, мұрағат, спутник суреттері және нақты көші-қон бағыттарына [негізделген]. Бұл аймақтар әр маусым сайын зардап шегеді. Бұл жерде «мүмкін» деп айта алмаймыз – қазір «болып отыр» деп жазды Кирилл Павлов.

Ол АШ министрлігінің деректеріне сүйене отырып, 2024 жылы шілдеде Жамбыл облысында шегірткеге қарсы 96 мың гектар жер өңделгенін, бірақ аумақта шегірткенің таралу аумағы 3,5 млн гектардан асқанын алға тартқан. Ол 2024 жылы осындай шараларға 8,1 млрд теңге жұмсалғанын атап өткен.

Ratel сайтының жазуынша, шегірткеге жауапты ауыл шаруашылығы министрлігіне қарасты өсімдікті қорғау басқармасы Павловтың жазбасындағы деректерді жоққа шығарып, Жамбыл облысында шегіртке басқан аумақ көлемі 107 мың гектардан асқанын, министрліктің жүйелі жұмыс жүргізіп жатқанын айтқан. Министрлікке қарасты Жамбыл облысындағы «Республикалық фитосанитариялық диагностика және болжамдар әдістемелік орталығы» республикалық мемлекеттік мекемесі Павловтан жазбаны өзгертуді сұраған.

Сайттың жазуынша, сотқа шақырылған Павлов енді бұған жауап ретінде бас прокурорға арыз жазып, ғайбаттау және кәсіби қызметіне кедергі келтіру бойынша шағым жазған.

"Ауыл шаруашылығы министрлігі конструктивті қимылдаудың орнына мемлекетке көмектесу мақсатында пікір айтып, материал жариялағаны үшін қысым, қоқан-лоқы және жария түрде айыптауға көшті" деді Павлов. Оның сөзінен сайт үзінді келтіреді.

22 мамыр күнгі брифинг кезінде Азаттық тілшісінің сұрағына жауап берген ауыл шаруашылығы вице-министрі Ермек Кенжеханұлы Павловтың желідегі жазбаларында “тиісті дәйектемелер” жоғын, шегірткенің таралу ауқымы барған сайын азайып келе жатқанын айтты.

“Біріншіден, былтырмен салыстарғанда шегірткенің таралу аймағы азайып келе жатыр. Екіншіден, ақпаратта тиісті берілген дәйектемелер жоқ. Сонымен қатар статистика бойынша да дұрыс дәйектемелер берілмеген. Бұл жерде біздің айтып отырғанымыз, 2,1 млн га жоспарланып отыр, ал берілген ақпаратта шегірткенің таралу аумағы кем дегенде 5 млн га деп көрсетілген” деді вице-министр.

АҚШ президенті Дональд Трамп 19 мамырда еуропалық лидерлермен сөйлескен кезде "Владимир Путин Украинадағы соғысты аяқтағысы жоқ, себебі ол соғыста жеңіп жатырмын деп санайды" деген. Бұл туралы дереккөздеріне сілтеп америкалық Wall Street Journal басылымы жазды.

19 мамырда Трамп Путинге хабарласып, Украинадағы соғыс туралы сөйлескен еді. Осыдан соң Трамп Украина президенті Владимир Зеленскийге және Еуропа одағына мүше елдердің лидерлеріне хабарласқан.

Wall Street Journal басылымының жазуынша, еуропалық лидерлер Путиннің соғысты аяқтағысы келмейтінін бұрынырақ түсінген, бірақ мұны Трамптың аузынан алғаш рет естіген. Дегенмен Трамп бұған дейін "Путин соғыстан шаршады, қақтығысты тоқтатқысы келеді" деп бірнеше рет айтқан еді.

Ақ үй Wall Street Journal басылымына пікір білдіруден бас тартып, "АҚШ президенті Путинмен әңгіме қалай болғаны жайлы желіде жазды" деген.

Трамп Truth Social желісінде "Әңгіменің ауаны өте керемет болды. Олай болмаса, бірден ашығын айтар едім" деп жазған.

Бұған қоса, Трамп Еуропа жетекшілеріне Ресей мен Украина арасындағы келесі келіссөз маусым айының ортасында Ватиканда өтуі мүмкін деген. АҚШ президенті Ватиканға мемлекеттік хатшы Марко Рубио мен арнайы уәкіл Кит Келлогты жіберетінін айтқан. Бұл жөнінде де The Wall Street Journal жазды.

Алиджан Ибрагимовтің ұлы Шухрат Ибрагимов ERG компаниясының бақылау пакетіне ие болу үшін қалған акционерлердің үлесін сатып алғысы келеді. Бұл жөнінде бірнеше дереккөзге сүйенген Financial Times жазды.

Басылымның жазуынша, ол Патох Шодиев пен жуырда қайтыс болған Александр Машкевичтің отбасына компанияның 40 пайыз акциясын өзіне сатуды ұсынған.

1994 жылы Eurasian Resources Group (ERG) компаниясын құрған Алиджан Ибрагимов, Александр Машкевич және Патох Шодиевтің әрқайсысы компанияның шамамен 20 пайыз акциясына ие, ал қалған 40 пайыз акция Қазақстан үкіметіне тиесілі.

38 жастағы ERG-да Шухрат Ибрагимовтің өзі 2015 жылдан бері істейді. 2021 жылы әкесі қайтыс болғаннан кейін директорлар кеңесінің құрамына енген.

Компанияның негізін қалаушылар былтыр өздерінің акцияларын мұраларына бере бастаған – Шодиев басқаруды ұлы Сабир Шодиевке, Машкевич жиен інісі Эдуард Сурлевичке тапсырған. Үлесті сату бойынша келіссөз сол кезде басталса, биыл наурызда Алексанр Машкевичтің өлімінен кейін жылдамдаған деп жазды басылым. Дереккөздер Шодиев пен Машкевичтің отбасылары үлестерін сатуға дайын екенін, бірақ оның бағасы дау болғанын айтқан. Олар акция пакеті үшін 1,8 млрд доллар сұраған, бірақ Ибрагимов одан азырақ соманы ұсынған. Тараптар сонымен бірге Ибрагимовтің өзге ортақ активтердегі үлесіне алмастыру мүмкіндігін де талқылаған.

ERG құпиялылықты алға тартып келіссөзге қатысты түсініктеме бермеген. Басылымның жазуынша, Қазақстан үкіметі негізгі акционердің тұрақты әрі ұзақмерзімді болғанын қалайды, сондықтан ол Ибрагимовті қолдаудан "кетәрі" емес.

Бұған дейін Reuters америкалық кәсіпкер Джеймс Кэмерон ERG-ді 5 млрд долларға сатып алғысы келетінін жазған еді. Кейін Шухрат Ибрагимов компанияның сатылатындығын жоққа шығарған.

Eurasian Resources Group (ERG) компаниясына Қазақстанда «Қазхром», «Қазақстан аллюминийі», Соколов-Сарыбай тау-кен байыту бірлестігі, «ТрансКом» және өзге де кәсіпорындар кіреді. Аталған кеніштерге тиесілі шахталарда жұмысшылар жиі зардап шегеді. Биыл ақпанда "Қазхромға" қарасты комбинатта төрт жұмысшыны күйік шалған. Олардың бірі кейін алған жарақаттан қаза болды.