Ресей мен Грузияның арасындағы көлік байланысы қайта жалғасты

ТБИЛИСИ: Бүгін Грузияның “Рустави-2” телеарнасы хабарлағандай, осы аптаның соңына қарай Ресей мен Грузияның арасындағы теңіз арқылы байланысы қайта жалғасады. Сонымен қатар бүгіннен бастап Мәскеу мен Тбилисидің арасында тікелей әуе қатынасы ашылады. Ресей Грузиямен арадағы көлік қатынасын грузин үкіметі 5 ресейлік офицерді “тыңшылық жасады” деген айыппен ұстаған 2006-ншы жылдың күзінде үзген болатын. Ол әрекетін ресми түрде “Мәскеудің көрсеткен қызметі үшін грузин компаниялары қарыз болып қалды” деген сылтаумен түсіндірді.