Ресей Иранның Бушер АЭС-іне қажетті жүктерді Әзірбайжан арқылы тасиды

БАКУ: Ресей Иранда өзі тұрғызып жатқан Бушер атом-электр стансасына қажетті жүктерді Әзірбайжан жері арқылы тасымалдау туралы ресми Бакумен келісімге келді. Ол туралы кеше Әзірбайжанның сыртқы істер министрі Эльмар Мамадьяровпен өткізген келіссөзінен кейін Ресейдің сыртқы істер вице-министрі Григорий Карасин хабарлады. Жуырда атом-электр стансасына қажетті ресейлік жабдықтар Әзірбайжанда 1 айдан ұзаққа кідіріп қалды. Ресми Баку ол әрекетін Иранға қарсы қабылданған халықаралық санкцияның бұзылмағанын тексеру қажеттігімен түсіндірді.