АСТАНА: Бүгін Парламент Мәжілісінің пленарлық отырысы 2008-інші жылғы бюджетке енгізілген түзетулерді мақұлдады. Экономика және бюджетті жоспарлау министрі Б.Сұлтановтың мәлімдеуінше, биылғы бюджеттің кірісі 30 млрд. теңгеге ұлғайып, 2730 млрд. теңгені, шығысы 153 млрд. теңгеге ұлғайып, 3064 млрд. теңгені құрайды. Мұнай өнеркәсібі саласынан Ұлттық мұнай қорына бұрынғыдан 400 млрд. теңгеден артық қаржы түсіп, Ұлттық қордың көлемі 4 трлн. теңге немесе 33 млрд. долларға жуық қаржыны құрайды.
