Accessibility links

Айыптылар сот залын тастап шықты


2008 жылдың 10 маусымында Астана қаласындағы Қазақстан Республикасының Жоғарғы сотында «Шаңырақ оқиғасы» бойынша ұзақ мерзімге бас бостандығынан айырылған төрт азаматтың адвокаттарының берген аппеляциялық шағым-арызы бойынша сот алқасының отырысы басталды. Сот ісі Алматы мен Астана қалаларының арасын байланыстырған телекөпір арқылы өтіп жатыр. Осыдан бір ай бұрын, бұл іс бойынша негізгі куәгерлері ретінде тергеу жұмысына және сотқа қатысқан ағайынды Айбатыр мен Бауыржан Ибрагимовтер бұрынғы берген айғақ жауаптарынан бас тартып, өздеріне полиция тергеушілері қысым көрсетіп, жалған мәлімет беруге мәжбүрлегенін мәлімдеген болатын.

Сот материалдарында жазылғандай, 2006 жылы 14 шілдеде трактор, бульдозер, жүк автокөлігімен келген атқарушы билік өкілдері Алматы қаласының Шаңырақ, Шаңырақ-2 ықшам аудандарындағы тұрғындардың заңсыз иемденген жер телімдерін босату жөнінде әрекет жасады. Нәтижесінде бірнеше адам жарақат алып, бір адам қаза тапты. Жиырмадан астам адам шартты түрде сотталып, төрт адам 14 пен 18 жылға шейін бас бостандығынан айырылды.

Сот үдерістерінен кейін куәгерлер азаптау негізінде берген жауаптарынан бас тартатындықтарын мәлімдеген. Бірақ, маусымның 10 күні Астанада жоғарғы соттағы аппеляциялық сот үдерісінде ол куәлар тыңдалмады.

Қоғамдық қорғаушылар бұған наразылық танытып, бейкүнә адамдар ұзақ жылдарға сотталып кетіп жатқандығын айтса, жәбірленушілер жағы айыптыларға жазаны қатайту керектігін талап етіп отыр.

Қоғамдық қорғаушы Жасарал Қуанышәлиннің айтуынша, куәгер баспасөзге әлгіндей мәлімдемесін жасаған соң оған тағы да қысым көрсетілген.

Аппеляцияға берген қорғаушылар осыны меңзеп қайта тергеуді талап етті. Бірақ, сот үдерісіне қатысқан Бас прокуратура өкілі прокурор Беркімбаев бұған қарсы болды. Оны сотқа төрағалық етуші Жоғарғы соттың судьясы Рысқалиев та қолдады. Қоғамдық қорғаушы Асылбек Қожахметтің айтуынша, прокуратура тергеушілерді қолдап отыр.

Мұны естіген сотталғандар Арон Едігеевтің бастауымен, егерде алғашқы жауабынан айныған куә пікірі тыңдалмаса, сот үдерісіне қатыспаймыз деп, сот залын тастап шығып кетті. Судья бұл олардың өз құқығы деп сотқа қатыспауға рұқсат берді.

Ал, Шаңырақ оқиғасында өртке оранып қаза болған полиция қызметкері Әсет Бейсеновтың әкесі Қуаныш Бейсеновтың пікірінше, бұл - тәртіпсіздік.

«Мен оқиғаға қатысқан адамдардың бәрін сотта деп отырған жоқпын, тек өмірдің қызығын көрмеген 24 жасар баламды аса қатігездікпен өлтірген айыптылар қатал жазаға тартылсын», - деді ол.

Жәбірленуші Ләйлә Жәкеева да сотталғандарды сот үдерісінен жіберу дұрыс емес дейді:

«Айыптыларға жазаны қаталдатып, кем дегенде 20 жылға соттау керек, жалғыз баладан айырылу дегеннің қалай болатынын айтып жеткізудің өзі мүмкін емес».

AzattyqTV

XS
SM
MD
LG