Пәкістан үкіметі ядролық ғалым 72 жасар Абдул Қадир Ханды үй қамауынан босату жөніндегі өздерінің шешімдерін қорғап отыр. Сенбі күні сыртқы істер министрі Шах Мехмуд Куреши үкімет Ханнан барлық қажетті ақпаратты тартып алып, оның қара базар торабына тосқауыл қойды деп айтты. Оның айтуынша, ядролық маман Ханның ешбір ықпалы да, ақпарат беру мүмкіндігі де жоқ. 2004 жылы Абдул Қадир Хан теледидар арқылы өзінің Иран, Либия және Солтүстік Кореяға ядролық құпия мәліметтерді бергенін мойындаған соң, ол үй қамауына алынған. АҚШ ресмилері енді оның босатылғанына алаңдаушылық танытып отыр.