Accessibility links

«АрселорМиттал Теміртау» АҚ - ның жұмысы тоқтап қалуы мүмкін


«АрселорМиттал Теміртау» АҚ баспасөз қызметінің хабарлауынша, әлемдік қаржы дағдарысына байланысты аталған кәсіпорынның дайын өнімдеріне сұраныс азайып, өнімнің бағасы рекордтық деңгейге дейін құлдыраған. Осыған байланысты «АрселорМиттал Теміртау» АҚ қаржылай қиыншылыққа тап болуда, шұғыл шаралар қабылданбаған жағдайда мұның соңы жұмысшылардың қысқартылуына, кәсіпорын жұмысының жекелей немесе толықтай тоқтатылуына әкелуі мүмкін.

2009 жылдың бірінші тоқсанында дайын өнімді жөнелту өткен жылдың осы уақытымен салыстырғанда 120 мың тоннаға азайған. Осы жылдың алғашқы тоқсанында кәсіпорын 100 490 000 АҚШ доллар шығынға ұшыраған. Шығарылатын өнімнің бір тоннасының бағасы 2008 жылдың 1 тоқсанында 781,8 АҚШ доллары болса, 2009 жылдың бірінші тоқсанында 604,2 АҚШ доллары болған. Бұған қоса екінші тоқсанға арналған болжам бағаның әрі қарайғы төмендеуін көресетеді, дайын өнімді жөнелту көлемі де ұлғаймайды, ағымдағы жағдайдың таяуда жақсаруы байқалмайды.

ҚР Еңбек кодексінің 48 бабына сәйкес, жұмысшылардың еңбек жағдайын өзгертуге, 2009 жылдың шілде айынан бастап үш ай көлемінде сыйақы мен басқа кейбір төлемдер түрін қысқартуға шешім қабылданды.

«АрселорМиттал Теміртау» АҚ бас директоры Франк Паннир қазіргі жағдайда мүлдем жұмыс істемеуден гөрі, аз ақшаға болса да еңбек етудің маңызды екенін ескертті.
XS
SM
MD
LG