Өткен аптаның сурет баяны
1 – 5 сәуір 2013 жыл

1
Қазақстан үкіметі әйелдердің зейнетке шығу жасын ұлғайту (58-ден 63 жасқа) туралы заңды мақұлдады. Бұған байланысты Қазақстанның бірнеше қалаларында азаматтардың қол жиналып, қарсылық хаттар жазылып жатыр. Көрнекі суретте: «Жастар» сарайы алдында жол жүру билетін алу үшін кезекте тұрған зейнеткерлер. Астана, 13 сәуір 2011 жыл.

2
Алмарасан сайындағы мейрамханалар мен кафелер қиратыла бастады. Бостандық ауданы әкімдігінің өкілі Бақытжан Наурызбековтың айтуынша, Іле Алатау ұлттық паркі басшылығы қорық аумағында жерді жалға алған кәсіпкерлердің барлығымен шарттарды біржақты түрде бұзған. Алматы, 5 сәуір 2013 жыл.

3
Алмарасан сайында кафе ғимаратын бұзып, ағаш тиеп жатқан жұмысшылар. Алматы, 5 сәуір 2013 жыл.

4
Сәуірдің 1-інде бір топ алматылық кәсіпкер шишамен қорқор шегуге (кальян) тыйым салынғаннен кейін кәсіпсіз қалғандарын айтып, баспасөз мәслихатын ұйымдастырды. Наурыздың 14-інде Қазақстанның бас санитарлық дәрігері Жандарбек Бекшин «Қоғамдық орындарда кальян шегуге тыйым салу» туралы қаулы қабылдаған еді. Бұл қаулыға көнбегендерге 10-40 айлық есептік көрсеткіш көлемінде айыппұл салынады. Суретте: Рустам Лазгиев, Қазақстанның кальян өнеркәсібі кәсіпкерлерінің қауымдастығының мүшесі. Алматы, 1 сәуір 2013 жыл.

5
Жаңаөзендегі «Мұнайфилдсервис» компаниясының жұмысшылары «ұжымдық келісім-шартта жазылған әлеуметтік талаптар орындалмай отырғанын», «жеке еңбек келісім-шарты жоқ» екенін айтып шағымданады. Көрнекі суретте: «Мұнайфилдсервис» жұмысшыларының былтырғы ереуілі. Жаңаөзен, 24 шілде 2012 жыл. (YouTube видеосынан алынған сурет).

6
Компанияның өндірістік базасының директоры Абдулатип Манапов жұмысшылардың «жалақысын мүмкіндігінше төлеп келе жатқанын», ал мұнайшылардың кейбір талаптары «ақылға қонымсыз» екенін айтады. Көрнекі суретте «Мұнайфилдсервис» жұмысшыларының былтырғы ереуілі. Жаңаөзен, 24 шілде 2012 жыл. (YouTube видеосынан алынған сурет).

7
Мүмкіндігі шектеулі екі бойжеткен «Бота» қорының мүгедек студенттерді қолдау грантын жеңіп алды. Олардың «Мобильдік студенттер клубы» бағдарламасы бойынша мүгедек жастар тегін дәрістерге қатысып, арнайы тапсырмалар орындайды. Жоба аясындағы сегіз компания үздік шәкірттерді практикадан өтуге шақырады. Суретте: Mobility club жобасының үйлестірушісі Меруерт Тілепалды. Алматы, 27 наурыз 2013 жыл.

8
Harlem Shake биін билеп, интернетке жүктегені үшін Қазақ ұлттық университеті журналистика факультетінің бір топ шәкірті және бейнеклипке «Like» басқан студенттер ескерту алды. Мұның алдында «ерсі биді» билегені үшін Қарағанды мемлекеттік техникалық университетінің екі студенті оқудан шығарылып, білім және ғылым министрі Бақытжан Жұмағұловтың араласуымен ғана оқуға қайта алынған. Суретте: Жандос Тастан (сол жақта), Мұрат Жұмамұрат, ҚазҰУ журналистика факультетінің 2-курс студенттері.