Алматы маңындағы Іле Алатауы ұлттық паркі аумағында орман өртеніп жатыр. Мамандардың айтуынша, сенбі күні кешке Қарғалы өзенінің аңғарында басталған өрт 7 гектар аумақты шарпыған.
Әуеден жүргізілген бақылау барысында негізінен орманды алқапта қураған ағаштар мен арша жанып жатқаны, ал кейбір жерлерде Тянь-Шань шыршаларын да шарпып жатқаны анықталғаны хабарланды. Зардап шеккен адамдар жайлы ақпарат жоқ.
Төтенше жағдайлар қызметі Үлкен Алматы шатқалында арнайы штаб құрған. Өртті өшіруге жеке құрамдағы 60 адам мен 2 тікұшақ жұмылдырылған.