Спорт және мәдениет министрлігі спорт комитетінің төрағасы Елсияр Қанағатов Астанадағы орталық коммуникациялар қызметінде өткен брифингте "Қазақстан 2016 жылы Рио-де-Жанейрода өтетін олимпиадада ауыр атлетикадан үш алтын алуы керек" деп мәлімдеді.
"Лондон олимпиадасында төрт алтын алған ауыр атлеттерден 2016 жылы өтетін олимпиадада кем дегенде үш алтын күтеміз. Алдағы уақытта Қазақстанда ауыр атлеттер дайындайтын ірі спорт кешені ашылады" деді спорт комитетінің төрағасы.
Брифингке қатысқан екі дүркін олимпиада, төрт дүркін әлем чемпионы Илья Ильин: "Мен өз жұмысымды жасадым. Жоспарым орындалып, әлем чемпионы атандым. Енді Рио-де-Жанейро олимпиадасына дайындаламын" деді.
Қарашаның 8-16-сы күндері Алматыда өткен ауыр атлетикадан әлем чемпионатында Қазақстан үш алтын, екі күміс медальмен 3-орын алды. Зүлфия Чиншанло (58 килограмм), Жасұлан Қыдырбаев (94 килограмм) және Илья Ильин (105 килограмм) чемпион атанды. Ал Жазира Жаппарқұл (69 килограмм) мен Владимир Седов (94 килограмм) күміс жүлде иеленді.
Рио-де-Жанейро олимпиадасы (Бразилия) 2016 жылы 5-21 тамыз аралығында өтеді.
