Accessibility links

Автокөліктегі дәрі-дәрмек туралы бұйрық күшіне енді


Алматы көшесіндегі автокөліктер. (Көрнекі сурет)
Алматы көшесіндегі автокөліктер. (Көрнекі сурет)

Қазақстан денсаулық сақтау және әлеуметтік даму министрінің бұйрығымен бүгіннен бастап автокөліктерде дәрі-дәрмектердің жаңа құрамы болуы шарт.

Талапқа сәйкес, автокөліктің дәрі-дәрмек қобдишасында ең кемінде үш проценттік сутек тотығы, қан тоқтатын бұрау, медициналық қолғап, жабысқақ пластыр, тазартылған мақта, ұшы мұқал қайшы және таңып-байлайтын материалдардың бірнеше түрі болуы тиіс.

Бұрынғымен салыстырғанда автокөліктегі дәрі-дәрмек құрамында орап-таңуға арналған материалдар саны көбейтіліп, медициналық препараттар алынып тасталған. Бұған дейінгі ереже автокөлікте үсік шалған кезде, жүрек ауырғанда, уланғанда, күйзелісті жағдайда қолданылатын, сонымен бірге, ыстық түсіретін, ауырғанды басатын дәрі-дәрмек, йод ерітіндісі мен жараға жағатын көк дәрі (зеленка) болуын талап ететін.

Әр автокөліктің белгіленген құрамдағы дәрі-дәрмек салынған қобдишасы болуы міндетті. Ал егер ол жоқ немесе ондағы заттар тиісті құрамдағыдан өзгеше болып шыққан жағдайда автокөлік жүргізушісіне ең төменгі айлық есептік көрсеткіштің бес еселенген (он мың теңгеге жуық немесе елу доллардан аса) мөлшері көлемінде айыппұл салынады.

XS
SM
MD
LG