Accessibility links

Ақтауда аштық жариялаған 2 адам дәрігерге қаралды


Ақтауда наразылық танытып аштық жариялап жатқан тұрғындар Ержан Қаулабаев (солдан оңға қарай), Яков Итченко және Бекзат Досжанов. Ақтау, 5 ақпан 2015 жыл.

Ақтауда аштық жариялаған балалар үйінің бұрынғы екі тәрбиеленушісі дәрігер көмегін алды.

Ақтауда балалар үйінің бұрынғы 12 тәрбиеленушісі ақпанның 4-інде өздері тұрып жатқан оралмандарды оңтайландыру орталығында өздерін жалақысы жоғары жұмысқа алуды талап етіп аштық жариялаған. Оның төртеуі - отбасылы.

Бүгін аштық ұстап жатқан екі қыз жағдайы нашарлап ауруханаға түскен. Аштық жариялаушы өзге тұрғындар олардың асқазандары ауырып, температурасы көтеріліп, жедел жәрдем көлігімен облыстық ауруханаға әкетілгенін айтқан. Жедел жәрдем дәрігерлері Азаттық тілшісіне "аштық жариялағандардың жағдайы жақсы" деп, денсаулықтары туралы ақпарат беруден бас тартқан.

Алайда облыстық денсаулық сақтау басқармасының бастығы Руслан Бектұрбаев Азаттыққа "аштық жариялаған Гүлсім Асқар мен Манзура Қалбаеваға "асқазан қызметінің бұзылуы" деген диагноз қойып, көмек көрсетіп жібердік. Бірақ бұл диагноз аштықтан туындай қоймаған. Қазір аштық ұстағандардың барлығының жағдайын бақылап отырмыз,-" деген.

Аштық жариялағандар дәрігерге қаралған соң үйлеріне қайтарылған.

Наразылық танытушылар 26 қаңтарда қалалық әкімдік пен прокуратураға аштық ұстайтындары туралы ескерту хат жазғандарын айтады. Аштық ұстаушылар табыстары күнкөріске жетпейтінін айтып,, өздеріне жалақысы жоғары жұмыс тауып беруін талап етіп қалалық әкімдік пен прокуратураға бірнеше рет қайырылғандарын айтады.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

XS
SM
MD
LG