Accessibility links

Таразда өзін өртеген жігіттің қазасы бойынша іс қозғалған


Жамбыл облысының аумақтық картасы.
Жамбыл облысының аумақтық картасы.

Қазақстан бас прокуратурасы сенбі күні Таразда өзін-өзі өртеп, кейін қалалық ауруханада қайтыс болған жас азаматтың қазасына байланысты қозғалған істі бақылауына алғаны туралы хабарлама таратты.

Бас прокуратураның айтуынша, қазанның 24-і күні жергілікті уақытпен сағат 10:30 шамасында Тараз қаласының орталық алаңында 1995 жылы туған Е.А.Бектібаев деген азамат өзін-өзі өртеп, кейін қалалық ауруханада қайтыс болған. Өзін өртемес бұрын Бектібаев бұндай жағдайға полиция қызметкерін кінәлап мәлімдеме жасаған.

«Бұл оқиғаның мән-жайын жан-жақты анықтау мақсатында Қазақстан қылмыстық кодексінің «Өзін-өзі өлтіруге дейін жеткізу» және «Билікті немесе қызмет өкілетін асыра пайдалану» баптары бойынша іс қозғалып, сотқа дейінгі тергеудің бірыңғай тізбесіне енгізілді» делінген Бас прокуратура таратқан ресми ақпаратта.

Сенбі күні Informburo.kz сайтында жарияланған видеода өзін Ерлан Абдуллаұлы Бектібаев деп таныстырған жас жігіт қазанның 24-і күні таңертеңгі сағат он кезінде Тараздағы «Нұр Отан» партиясы ғимараты алдында тұрғанын айтады.

Ол камераға қазанның 22-сі күні өз жұмыстарымен Тараздағы әлеуметтік мекемеге барған кезде «жергілікті полиция қызметкерлері есірткі салып жіберіп, кейін қыспаққа алғанын» мәлімдейді. Жігіт анасы қайтыс болып, әкесі басқа отбасымен тұратынын, өзінің «басатын тау, бармаған жері қалмағанын» айтып, «мені осындай жағдайға жеткізді» деп Самат деген полиция қызметкерінің есімін атайды.

Бұдан соң өз-өзіне қол жұмсайтынын мәлімдеп, пластикалық бөтелкедегі жанармайға ұқсайтын сұйық затты үстіне құйып, от тұтады. Видео тұла бойы жалынға оранған жігіттің жанұшыра айғайлай жүгіріп «Нұр Отан» ғимаратына кірген сәтімен аяқталған.

Жамбыл облыстық және Тараз қалалық полиция мекемелері әзірше бұл оқиғаға байланысты түсініктеме берген жоқ.

XS
SM
MD
LG