Ресейдің Магадан қаласы түбіндегі қуғын-сүргін құрбандарына арнап орнатылған ескерткішті әлдекімдер бүлдіріп кетті. "Қасірет бетпердесі" деп аталатын алып монументке белгісіз адамдар қызыл бояумен "Сталин тірі" деп жазып, бес жұлдыздың суретін салып кеткен.
Жергілікті полиция 1 желтоқсанда бұл іс бойынша тергеу басталғанын хабарлады.
1930-1950 жылдардағы саяси қуғын-сүргін құрбандарына арналған "Қасірет бетпердесі" деп аталатын ескерткіш 1996 жылы Магадан түбіндегі Крутая шоқысында орнатылған. Бұл шоқының етегінде мыңдаған тұтқынды Колыма өлкесіне жөнелтетін транзиттік лагер орналасқан.
Ескерткішті ресей-америкалық әйгілі мүсінші Эрнст Неизвестный жасаған. Мүсінші биыл 91 жасында Нью-Йоркте қайтыс болды.
