АҚШ федералдық тергеу бюросы (FBI) ел аумағында «Ислам мемлекеті» экстремистік тобы террорлық шабуылдар жасауы мүмкін деп ескертті.
Арнайы қызмет рождество мерекесі кезінде АҚШ-тағы шіркеулерге шабуыл жасауға дайындық жасалып жатқаны туралы ақпарат алған. Құжатта терроршылар тарабынан нақты қандай қауіп-қатер төніп тұрғаны айтылмаған. Федералдық тергеу бюросы АҚШ азаматтарын қырағылық танытуға шақырып, террорлық қауіп деңгейі жоғары деп бағаланып отырған Иордания мен Египетке сапардан тартына тұруды ескерткен.
Желтоқсанның 19-ы күні Берлинде жаңа жыл базарына жасалған шабуылдан кейін АҚШ-тың Нью-Йорк, Чикаго және Сан-Франциско қалаларында билік қауіпсіздік шараларын күшейткен. Берлиндегі 12 адамның өмірін қиып, 50 адам зардап шеккен шабуылдың жауапкершілігін «Ислам мемлекеті» экстремистік тобы мойнына алған.
