Accessibility links

Techno Trading-тің наразы жұмысшылары аштық жариялады


Techno Trading LTD жұмысшылары аштық акциясында президент Нұрсұлтан Назарбаевтан құқықтарының бұзылуына жол бермеуге шақырған плакат ұстап тұр. Маңғыстау, 5 қаңтар 2017 жыл.

Маңғыстау облысында бүгін Techno Trading LTD компаниясының ондаған жұмысшысы аштық жариялады.

Компанияда оператор болып істейтін Берік Ергенбаевтың айтуынша, Мұнайлы ауданының Қызылтөбе ауылында өтіп жатқан наразылық акциясында 133 жұмысшы аштық ұстап отыр. Жұмысшылар компания басшылығынан жалақыны көбейтуді, тоқсан сайын берілетін сыйақыны тұрақты төлеуді, белсенділік танытқан жұмысшыларды қудалауды тоқтатуды талап етеді. Жұмысшылар сонымен қатар жұмыстың экологиялық зияны, қосымша атқаратын жұмыстары үшін де ақы төлеуді талап етіп отыр.

Жұмысшылар акцияда Қазақстан президенті Нұрсұлтан Назарбаевтан жұмысшылар құқығының тапталуына жол бермеуді сұраған плакат ұстап шыққан.

Жұмысшылар бүгін таңертең аштық жариялауға әуелі компания кеңсесі орналасқан Бірлік кентіне барғанын, бірақ кеңсені полиция қоршап алып, ешкімді өткізбегенін айтады.

Бұдан соң олар Қызылтөбе кентіндегі кәсіподақ орналасқан "Мерей" қонақүйіне барып, аштықты кәсіподақ кабинетінде жариялаған. Наразылар судан басқа ешнәрсе ішпеуге бекінгендерін мәлімдеген.

Жұмысшылар компания басшылығына аштық жариялайтыны туралы 23 желтоқсанда арыз жазғанын айтады.

Techno Trading компаниясындағы жұмысшылар наразылығы былтырдан бері жалғасып келеді. Бірнеше мәрте митинг өткізіп, кейде жұмысқа шығудан бас тартқан жұмысшылар жұмыс орындарын қысқартпауды, әлеуметтік төлемдер мен тоқсандық сыйақыларын тұрақты төлеуді, жалақыны көбейтуді, наразылық шарасынан кейінгі қысымды тоқтатуды талап еткен. Наразылық акциясынан соң алты жұмысшы – Эрик Мифтахов, Марат Кеммекиев, Ерсайын Түйешиев, Айболат Өтесінов, Жолдас Көкімбай мен Мырзабек Изенов "себепсіз жұмыста болмады" деген негізбен жұмыстан босатылған еді. Олардың жұмыс берушінің үстінен жазған шағымын қараған Мұнайлы аудандық соты компания басшылығының бұйрығын қуаттап шешім шығарған.

Пікіріңіз

Оқырман пікірлері

XS
SM
MD
LG