Accessibility links

Қырғызстанда ұшақ апаты бойынша қылмыстық іс қозғалды


Ұшақ құлаған жерде тұрған полиция қызметкерлері. Қырғызстан, 16 қаңтар 2017 жыл.

Қырғызстанның бас прокуратурасы осы елдің Шу облысында орналасқан Манас әуежайы маңындағы саяжай үйлеріне құлаған Боинг-747 жүк ұшағы апаты бойынша қылмыстық іс қозғады. Іс Қырғызстан қылмыстық кодексінің "Әуе көліктерін қолдану кезінде қауіпсіздік шараларын бұзып, кісі өліміне себепкер болу" бабымен ашылды.

Қаңтардың 16-сы күні Қырғызстан астанасы Бішкекке жақын жердегі Манас халықаралық әуежайы маңында Гонконгтен Стамбулға ұшып бара жатқан түркиялық Боинг-747 жүк ұшағы саяжай үйлеріне құлап, 30-дан астам адам қаза тапты. Оқиға орнында жүрген төтенше жағдайлар министрі Кубатбек Боронов Азаттықтың Қырғыз қызметіне:

- 32 адам қаза тапты. Оның 28-і біздің (Қырғызстан - ред.) азаматтар, төртеуі - ұшақ экипажының мүшелері,- деді.

Ұшақ құлаған саяжай аумағындағы 20-дан аса тұрғын үйлер қирады. Опат болған адамдар арасында балалар да бар. Әзірге жүк ұшағының неден құлағаны белгісіз. Азаттықтың Қырғыз қызметі тілшісіне халықаралық Манас әуежайы баспасөз хатшысы Әлия Құрбанова:

- Ұшаққа қалың тұман кесірін тигізуі мүмкін, бірақ біз әзірге анық ештеңе айта алмаймыз. Анық ақпарат болса, кейінірек хабарлаймыз, - деді.

Ұшақ жанармай толтыруға қонбақ болған деген болжам бар. Қазір оқиға орнында үкімет комиссиясы жұмыс істеп жатыр.

AzattyqTV

Аудиоподкаст

XS
SM
MD
LG