Accessibility links

Шымкенттік белсенділер "26-бапты өзгертуге қарсылық" хатын тапсырды


Шымкенттік белсенділер Шымкент қаласы ішкі саясат бөлімінің басшысы Қанат Қалыбековке (ортада) конституцияның 26-бабын өзгертуге қарсылық хатын тапсырып отыр. 20 ақпан 2017 жыл.

Бүгін шымкенттік белсенділер Шымкент қаласы әкімдігі ішкі саясат бөліміне 200-ден адамның қолы қойылған қарсылық хатты тапсырды деп хабарлайды Азаттық тілшісі.

"Қазақстан республикасы конституциясы 26-бабының 1,2-тармақтарына өзгеріс енгізуге қарсымыз" деген мәтіннің астына реттік нөмір бойынша аты-жөні жазылған хатқа 228 адам қол қойған. Белсенді Ардақ Әшімованың айтуынша, бұл хатқа азаматтар ерікті түрде қол қойған.

- Бұл бап бойынша халықтың көбі хабарсыз. Естіп білгендер хатқа сөзге келмей қол қойып жатыр, - дейді белсенді.

Ардақ Әшімованың пікірінше, мемлекеттің тағдырын шешетін бап болса да талқыға салу мерзімі аз.

Шымкент қаласы ішкі саясат бөлімінің басшысы Қанат Қалыбековтың айтуынша, қандай да бір ұсыныс болса оған пікір айтуға әрбір азаматтың құқығы бар. "Қазір талқылау жүріп жатыр. Ұсынысты жазуға, ой-пікір айтуға болады" дейді шенеунік.

Белсенді Жанысбек Өтегеннің сөзінше, хатқа қол қойғандар - 26-баптың өзгеруіне қарсылық танытып жатқандардың бір бөлігі ғана.

- Бұған дейін жүзге жуық азаматтың қолы қойылған хатты қала және Оңтүстік Қазақстан облысының әкімдігіне тапсырдық. Қол жинауды әлі де жалғастырамыз, - деді ол.

Қанат Қалыбеков белсенділердің хатын түпнұсқасында қабылдап алғанын растап, хаттың көшірмесіне қол қойып, мөр басып берді.

Пікірлерді көріңіз (5)

Бұл форум жабық. Бірақ пікірталасты Азаттықтың Facebook-парақшасында жалғастыра аласыз: https://www.facebook.com/azattyq
XS
SM
MD
LG