Accessibility links

Ақтауда университет оқытушылары ректордың отставкаға кетуін талап етті


Шахмардан Есенов атындағы Каспий технология және инжиниринг университеті оқытушылары. Ақтау, 26 ақпан 2017 жыл.

Ақтаудағы Шахмардан Есенов атындағы Каспий технология және инжиниринг университетінде бүгін білім және ғылым министрлігі өкілі Дархан Ахмад Заки оқу орнының ректоры Әділбек Ботабековтің үстінен шағымданған оқытушылармен кездесті. Университет оқытушыларынан 200-ге жуық адам қатысқан кездесу таңертеңгі сағат 10-нан кешкі сағат беске дейін жалғасты.

Бұған дейін Шахмардан Есенов атындағы Каспий технология және инжиниринг университеті оқытушылары ректор тарапынан қысым көргендерін айтып, білім және ғылым министрлігі, бас прокуратура, премьер-министр мен президент әкімшілігіне шағым жазған.

Жыл басында Қазақстанның алты жоғары оқу орнында ректорларды тағайындау конкурсы жарияланған. Шахмардан Есенов атындағы Каспий технологиялар және инжиниринг университеті басшылығына 7 кандидат тіркелген.

Машина құрастыру кафедрасы доценті Сәтжан Айсаевтың айтуынша, бүгінгі кездесуде университет ұстаздары оқу орнының қазіргі басшысы Әділбек Ботабековтің кандидатурасын ректорлыққа үміткерлер тізімінен алып тастауды талап еткен. Осы талаппен білім және ғылым министрі Ерлан Сағадиевке жазылған үндеуге университеттің педагогтық-профессорлық құрамынан 130 адам қол қойған. Үндеуді білім және ғылым министрі Ерлан Сағадиевке жеткізу үшін кездесуде оқытушылар Дархан Ахмед Закиге табыс еткен.

Білім және ғылым министрлігі өкілі Дархан Ахмад Заки мен оқу орны ректоры Әділбек Ботабеков жиын аяқталған соң Азаттыққа комментарий беруден бас тартты. Бұған дейін ректор өзіне тағылған айыптарды жоққа шығарып, ұстаздар шағымын «абыройымды түсіруді көздеген қарсыластарымның әрекеті болуы мүмкін» деп санайтынын айтқан болатын.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

Пікірлерді көріңіз (1)

Бұл форум жабық. Бірақ пікірталасты Азаттықтың Facebook-парақшасында жалғастыра аласыз: https://www.facebook.com/azattyq
XS
SM
MD
LG