Алматыда бүгін "Нұр Отан" партиясының қалалық филиалының кеңсесінде республиканың бірнеше қаласынан жиналған 20 шақты адам Қазақстандағы сот жүйесіне наразылықтарын білдірді.
Азаттық тілшісінің хабарлауынша, жиналғандар сотта жеңілгендерін айтып, "әділетсіз сот шешімі салдарынан үйімізден, Сарыағаш шипажайындағы жерлеріміз бен бизнестерімізден айырылдық" деп мәлімдеді. Наразылар президент Нұрсұлтан Назарбаевтан, "Нұр Отаннан", бас прокурор Жақып Асановтан өз істерінің қайта қаралуына көмектесуді сұрады. Олар өздерінің талап-арыздары жазылған хатты партияның кеңсесіне тапсырды. Жиналғандар қолдарына ағылшын тілінде "Қазақстандағы заңсыздық тоқтатылсын!", "Президент Назарбаев, көмектес" деген жазулары бар плакаттар ұстап шықты.