Қырғызстан төтенше жағдайлар министрлігі Ош облысы Өзген ауданы Зергер ауылдық округіндегі Аюу ауылында 24 адам көшкін астында қалып, мерт болғаны туралы хабарлады. Оқиға болған жерде іздестіру жұмыстары жалғасып жатыр.
Аюу ауылындағы қауіпті аумақтан 40 отбасыны көшіру шаралары жүргізіліп жатыр деп хабарлады Азаттықтың Қырғыз қызметі. Денсаулық сақтау министрлігінің мәліметі бойынша, қаза тапқандардың туыстарынан үш адам Өзген қаласындағы ауруханаға жатқызылған.
Сәуірдің 29-ы күні таңертең Аюу ауылында көлемі шамамен бір миллион текше метрді құрайтын көшкін жүріп, 24 адаммен қоса жеті үйді тас-топырақ басып қалған. Аюу ауылындағы қайғылы оқиғаға байланысты Қырғызстан президенті Алмазбек Атамбаев үндеу жасаған.
