Accessibility links

Алматыда сот мұсылман уағызшысының бас бостандығын 5 жылға шектеді


Руслан Жаниев, мұсылман дін уағызшысы Денис Коржавиннің адвокаты. Алматы, 11 мамыр 2017 жыл.
Руслан Жаниев, мұсылман дін уағызшысы Денис Коржавиннің адвокаты. Алматы, 11 мамыр 2017 жыл.

Бүгін Алматының Алмалы аудандық соты мұсылман уағызшысы, 33 жастағы тұрғын Денис Коржавинді діни алауыздықты қоздырды деп айыптап, бес жылға бас бостандығын шектеу туралы үкім шығарды. Коржавинді соттауға оның әлеуметтік желіде "Үш негіз" деп аталатын діни кітаптың мазмұнын араб тілінен орыс тіліне дәріс түрінде аударып жариялауы себеп болды. Қазақстанда бұл кітапқа 2011 жылы тыйым салынған.

18 ақпаннан бері тергеу абақтысында отырған Коржавин сот залынан босатылды. Сот бүгін басталып, бүгін аяқталды.

Сот Коржавинге сот үкімі күшіне енетін 15 күнге дейін ешқайда кетпеу туралы қолхат жазу түрінде бұлтартпау шарасын белгіледі. Сот күшіне енгеннен бастап 10 күн ішінде ол жергілікті пробациялық бақылау органына есепке тұруы тиіс.

Коржавинге үкім Алматы қалалық прокуратурасымен жасалған процессуалдық келісім нәтижесінде шығарылды. Процессуалдық келісім соталды тергеу барысында Алматы қалалық ішкі істер департаментінің тергеушісі Алексей Чапурин арқылы жасалған.

Сот аяқталған соң Денис Коржавин мен оның адвокаты Руслан Жаниев Азаттыққа сот үкіміне шағымданбайтынын айтты.

  • 16x9 Image

    Қазис ТОҒЫЗБАЕВ

    Қазис Тоғызбаев 2008 жылғы қыркүйектен бастап өмірінің соңына, яғни 2021 жылғы 28 ақпанға дейін Азаттықтың Алматыдағы тілшісі ретінде еңбек етті. Азаттыққа дейін оппозициялық "Сөз" және "Азат" газеттерінде, kub.info сайтында тілші болған.

XS
SM
MD
LG