Бүгін Батыс Қазақстан облысының орталығы Оралда Совет одағының батыры, Екінші дүниежүзілік соғыста қаза тапқан Мәншүк Мәметоваға орнатылған ескерткішті сүруге қарсы жалғыз кісілік пикет өткізген Оксана Терновскаяны полиция ұстады.
Азаттық тілшісінің хабарлауынша, Қазақстанда жойылған Коммунистік партияның жақтасы Оксана Терновская бүгін билік сүре бастаған ескерткішке барып, қолына "Совет одағының батыры Мәншүк Мәметованың ескерткішінен қолыңды тарт" деген жазуы бар қағаз ұстап біраз уақыт тұрды. Оның қарсылық акциясын полиция қызметкерлері бақылаған. Ол қолындағы қағазын жанына жерге қойған сәтте өзін таныстырмаған полиция капитаны бағынышты полицейлерге Терновскаяны "қоқыс тастағаны үшін" ұстауға пәрмен берді. Терновскаяны Абай аудандық ішкі істер басқармасына алып барды.
Оралда бүгін Мәншүк Мәметованың ескерткішін сүре бастаған. Қаланың орталығындағы биіктігі бес метр, салмағы сегіз тонналық бұл ескерткіш 30 жылдан астам уақыт тұрған. Билік ескерткішті техникалық тұрғыдан тозығы жеткендіктен сүріп жатқанын айтады. Жергілікті әкімдік Мәншүк Мәметованың ескерткішінің орнына Екінші дүниежүзілік соғыстың батырлары пулеметші Мәншүк Мәметова, мерген Әлия Молдағұлова және ұшқыш Хиуаз Доспанованы бейнелейтін "Қазақ халқының даңқты қыздары" мүсіндік композициясы орнатылатынын айтады. Биліктің ақпараты бойынша, композиция Астанада жасалады, құны 138 миллион теңгені құрайды. Жергілікті билік Мәншүк Мәметованың ескерткішін сүрген соң Мәметованың туған жері Батыс Қазақстан облысының Бөкей ордасы ауданына жөнелтуі мүмкін екенін айтады.
Оксана Терновская өзін ұстағанға дейін бұған дейін әкімдікке Мәншүк Мәметованың ескерткішін сүрмеуді сұрап хат жазғанын хабарлаған.
