Accessibility links

Алматыда Назарбаевқа журналист Мамайды қолдауды сұрап хат жолдады


Журналист Жанболат Мамайды және сотталған басқа да белсенділерді қорғауды сұрап, президент Нұрсұлан Назарбаевқа хат жолдауға жиналып тұрған белсенділер. Алматы, 6 маусым 2017 жыл.

Алматыда тәуелсіз журналист, қамауда отырған Жанболат Мамайды қолдау комитеті Қазақстан президенті Нұрсұлтан Назарбаевтың атына Мамайды және және басқа да сотталған белсенділерді қорғауды сұрап ашық хат жолдады.

Белсенділер Алматыдағы «Қазпоштаның» Бөгенбай батыр мен Абылайхан даңғылының қиылысында орналасқан орталық бөлімшесіне жиналды. Журналист Рысбек Сәрсенбай жиналғандар алдында президентке жолданатын хатпен таныстырды. Сәрсенбай оқыған хатта«Трибуна. Саяси қалам» газетінің бас редакторы міндетін атқарушы Жанболат Мамайдың қамауда отырғанына бес айға ұласқаны, комитет мүшелері оны «журналистік қызметі, көзқарасын ашық білдіргені, саясатқа араласқаны үшін қудаланды деп білетіні» жазылған. Оны қамамас бұрын «Трибуна. Саяси қалам» газетіне сот арқылы әлденеше рет қысым жасалғаны айтылады.

«Мамай оппозицияшыл көзқарасынан, бағытынан танбады... Астанаға, әуежайға сіздің есіміңізді беру ұсынысына қарсы шықты» делінген хатта Назарбаевқа қарата.

Хатта сонымен қатар Назарбаевтың таяуда Қазақстанда саяси қуғын-сүргін жоқ деп мәлімдегені, егер солай болса, «ой-пікірлерін еркін білдірген Макс Боқаев, Талғат Аяндың «ұлтаралық араздықты қоздырды», «рұқсат етілмеген митинг ұйымдастырды» деген айыппен бес жылға неге сотталды?» деген де сұрақ қойылған.

Назарбаев 31 мамыр - саяси қуғын-сүргін құрбандарын еске алу Ақмола облысының Ақмол ауылында Қазақстанда саяси қуғын-сүргін жоқ деп мәлімдеген.

Белсенділер Мамайдың жас баласы, қарауында кәрі ата-анасы барын айтып, оған қарсы «саяси астары бар» қылмыстық қудалауды тоқтатуға ықпал етуді, Талғат Аян мен Макс Боқаевтың тағдырына бей-жай қарамауды сұрайды.

Хатқа сол жерде ондаған белсенді қол қойып, оны Астанадағы президент әкімшілігіне жолдады.

Жанболат Мамай 2017 жылы 10 ақпанда сот шешімімен екі айға қамалған. Тергеу тарабы "2009 жылдан бері Еуропада жүрген бұрынғы банкир және оппозициялық саясаткер Мұхтар Әблязов БТА банкінен ұрланған ақшаның бір бөлігінің ізін Мамай басқаратын "Трибуна. Саяси қалам" газеті арқылы қаржылық операциялар жасап жасырған" деп күдіктенеді. Журналист бұл айыпты мойындамайды. Ал Мұхтар Әблязов бұл айыптауды "абсурд" деп атап, Мамаймен ешқашан кездеспегенін мәлімдеген.

Сот 31 мамырда Мамайды қамау мерзімін 10 шілдеге дейін ұзартқан.

Жанболат Мамай абақтыда өзін соққыға жыққаны туралы хабарлаған соң оны қорғау комитеті құрылған.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

AzattyqTV

Аудиоподкаст

XS
SM
MD
LG