АҚШ президенті Дональд Трамптың сайлау штабының бұрынғы басшысы Пол Манафорт кезінде Украина билігіне саяси кеңес бергені үшін АҚШ әділет министрлігіне шетелдік агент ретінде тіркелді.
Министрлікке тапсырған құжатына қарағанда, Пол Манафорттың фирмасы 2012-2014 жылдар аралығында Украинаның сол кездегі президенті Виктор Януковичтің «Аймақтар партиясына» кеңес беріп, ақысына 17 миллион доллар алған.
Былтыр Трамптың сайлау кампаниясы өтіп жатқан кезде оның штаб басшысының шетелден қаржы алғаны жайлы сөз шығып, Манафорт міндетінен босатылған еді. Украина билігі Манафорттың фирмасына ақша төлеуде заңсыздық болмағанын айтады.
Саяси кеңесші әрі лоббист Пол Манафорт кезінде Джеральд Фордтың, Рональд Рейганның, Үлкен Джордж Буштың сайлау кампанияларын өткізген.
