Accessibility links

Шымкентте ер адам юбка киіп сотқа наразылық білдірді


Юбка киіп облыстық сот алдына шығып, наразылық білдіріп тұрған адам. Шымкент, 10 шілде 2017 жыл.

Бүгін Шымкентте Оңтүстік Қазақстан облыстық соты ғимараты алдында бір ер адам әйелдердің юбкасын киіп алып наразылық танытты, деп хабарлайды Азаттық тілшісі.

Аты-жөні мен түрін көрсетпеуді сұраған жасы отыз шамасындағы ер адам сот қаулысына наразылық ретінде юбка киіп шыққанын айтады. Оның айтуынша, Мақтарал аудандық сотының судьясы осы азамат С. Мұсабеков колледж директорының үстінен түсірген шағымды қарап қаулы шығарған. Қаулыда судъя оны "азаматша" деп жазған. Ал Шардара аудандық соты оның мекен-жайын қате көрсеткен. «Мекен-жайымды қате көрсеткеннен соң заң талаптарын орындайын деп Шымкент қаласындағы тұрақты мекен-жайымнан Ордабасы ауданы Шұбарсу елдімекеніне "көшуге" мәжбүр болып отырмын» дейді ол.

- Қазақстанның әрбір азаматы соттың қаулысын орындауға міндетті. Бұл жерге мен Мақтарал ауданы сотының қаулысына сай міндетімді орындау үшін келіп тұрмын. "Азаматша" деген сөз менің ар-намысыма тиіп бітті, - дейді наразылық танытушы адам.

Наразылық танытқан азаматты қабылдаған облыстық соттық судьясы Мұхтар Абайұлының айтуынша, бұл азаматтың екі сұраныс хатына жауап берілген. «Қаулы намысыма тиді десеңіз, шағым түсіріңіз» деді ол наразылық білдірген азаматқа.

- Тәртіп бойынша облыстық соттың төрағасы сізді қабылдағанымен қазір бұл соттың қаулысын бұза алмайды. Ертең келіңіз, төраға қабылдайды, - деді судья.

Наразылық танытушы адам бұл мәселе бойынша облыстық соттың төрағасы мен жоғарғы соттың төрағасына шағым түсірді.

Юбка киген адамның наразылығы. Шымкент. 10 шілде, 2017 жыл.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

AzattyqTV

XS
SM
MD
LG