Қазақстанда Құрбан айт мейрамы басталды

Қазақстанда бүгін таңертең қалалар мен ауылды жерлердегі мешіттерде айт намазы оқылды. Алматы орталық мешітіне жиылған жамағаттың мешітке сыймағандары намаздарын ғимараттың сыртында оқыды.

Әлем мұсылмандары үш күн тойлайтын Құрбан айт мейрамымен халықты Қазақстан президенті Нұрсұлтан Назарбаев. Құттықтау мәтінінде "Құрбан айт – ізгілік пен мейірбандықтың, жақсылық пен қайырымдылықтың мейрамы. Біздің елімізде Құрбан айт әртүрлі этностар мен дін өкілдері арасында өзара сыйластықтың, достық пен бірліктің бірегей дәстүрлерін сақтауға және оны нығайта түсуге ықпал етеді" деп жазылған.

ФОТОГАЛЕРЕЯ: Астанадағы құрбан айт

• Өркен ЖОЯМЕРГЕН

Астана қаласында құрбан айт намазы таңғы 7-де оқылды. Айт намазынан кейін жұрт үш күн тойланатын мерекені бастап кетті. Олар ұлттық ойындар ойнап, мерекелік дастарханнан дәм татты. Астана, 1 қыркүйек 2017 жыл.

Жыл сайын мұсылман күнтізбесі бойынша зуль-хиджа айының оныншы жұлдызында басталатын Құрбан айт кезінде мұсылмандар бір-бірін құттықтап, жақын-туыстарының үйін аралайды. Осы күні әр мұсылманның үйінде мерекелік дастархан жайылады, шамасы келгенде құрбан шалады.

Құрбан айт мейрамының алғашқы күні Қазақстанда демалыс болып белгіленген.

ФОТОГАЛЕРЕЯ: Алматыдағы құрбан айт

• Санат НҰРБЕКОВ
• Нұрбек ТҮСІПХАН

Қазақстанда қалалар мен ауылды жерлердегі мешіттерде айт намазы оқылды. Алматы орталық мешітіне жиылған жамағат құрбан шалып, түрлі ұлттық ойындар ойнады. Мешіттің бас имамы "бұл жердегі мақсатымыз халықты дастархан барысында, спорттық ойындар барысында жат ағымнан қайтару" дейді.