Accessibility links

Исаков: Қазақстан шекара мәселесін шешеді деп үміттенеміз


Сапар Исаков, Қырғызстан премьер-министрі.

Қырғызстан премьер-министрі Сапар Исаков 25 қазанда Еревандағы Еуразия үкіметаралық кеңесінің отырысында қазақ-қырғыз шекарасындағы жағдайға қатысты пікірін айтты.

- Біз премьер-министрлер деңгейінде бұл мәселені шешу үшін келіссөз жүргізіп жатырмыз. Екі ел шекарасындағы кейбір кедергілер жойылды. Ол үшін Қазақстанға алғыс айтамыз. Бірақ бұл мәселе туындамауы керек еді. Себебі екі ел арасындағы келісімге сай жүк тиеген қырғыз көліктері шекарада тұрып қалмай кедергісіз өтуі тиіс. Еуразия экономика одағының принциптері бойынша тауар, капитал, қызмет пен жұмыс күшінің қозғалысына кедергі болмауы керек. Қазақстан тарапы шекарадағы мәселені толық шешеді деп үміттенеміз,- деді Исаков.

Еревандағы отырыста Қазақстан премьер-министрі Бақытжан Сағынтаевтың Сапар Исаковпен кездескені хабарланды.

10 қазаннан бастап екі ел шекарасында тексеру күшейтіліп, Қазақстанға өтетін адамдар мен көліктер кезегі пайда болған.

18 қазанда Астанада екі ел премьер-министрлері келіссөздер өткізіп, жолаушы көліктері мен жүгі бар адамдарды шекарадан өткізуді оңайлату туралы уағдаласқан. Бұл келіссөзден кейін тексеру бекетінде кезек күткен адамдар саны азайған еді. Ал 25 қазанда Қырғызстан шекара қызметі "Ақ-тілек" шекара бекетінде бес жүзге жуық жүк көлігі тұрғанын хабарлады.

Пікіріңіз

Оқырман пікірлері

XS
SM
MD
LG