Бүгін Астанадағы Ішкі істер министрлігі ғимараты алдындағы «Отан Ана» монументі жанында 1986 жылғы Желтоқсан оқиғасына қатысқан адамдар мен азаматтық қоғам белсенділері Желтоқсан және Жаңаөзен құрбандарын еске алды.
Шараға жиналған жиырмаға жуық адам алдымен Желтоқсан және Жаңаөзен оқиғалары туралы естеліктер айтты. Олар 1986 жылғы қазақ жастарының жаппай көтерілісін күшпен басып-жаныштаған сол кездегі билік пен 2011 жылғы 16 желтоқсанда Маңғыстау облысы Жаңаөзен қаласында еңбек дауы негізінде ереуілде тұрған мұнайшыларға оқ атқан полицияның әрекетін айптады.
Жиналғандар кезектесіп сөйлеп жатқанда, монумент орналасқан саябақ ішімен өтіп бара жатқан бірнеше адам тоқтап, сөз тыңдау үшін кідірді.
Шара барысында монумент маңында жиналғандарды сырттай бақылап жүрген полиция өкілдері болған жоқ.
Азаматтық белсенділер екі оқиғада қаза болған адамдарды еске алып, бір минуттық үнсіздік жариялады. Одан кейін монументке гүл шоқтарын қойып, қаза тапқандардың рухына бағыштап құран оқыды.
Кешеден бері 1986 жылғы Желтоқсан және 2011 жылғы Жаңаөзен оқиғаларына қатысты Қазақстанның өзге қалаларында да еске алу шаралары өтті.
1986 жылы Мәскеудің Қазақ ССР-і басшылығына республикаға белгісіз Геннадий Колбинді тағайындау туралы шешімі студент және жұмысшы қазақ жастарының наразылық шеруіне ұласқан. Алматының орталық алаңында екі күнге жалғасқан шеруді билік күшпен басып-жаншыды. Желтоқсан оқиғасынан кейін жүздеген адам жоғары оқу орындарынан шығарылды, жұмысынан қуылды. Желтоқсан оқиғасына қатысты нақты қанша адамның қуғынға ұшырағаны әлі күнге белгісіз.
ФОТОГАЛЕРЕЯ: Желтоқсандағы құрбандарды еске алу
