Accessibility links

Парламент мәжілісінің депутаттары сәрсенбіде сенаттың әкімшілік құқық бұзушылық туралы кодекске кейбір жол ережесін бұзуға қатысты жазаны жеңілдететін түзетулер жобасына жасаған ескертпесіне келісіп, мақұлдады.

Сенат әкімшілік құқық бұзушылық туралы кодекске түзетулер мен толықтырулар енгізу туралы заң жобасына бірсыпыра ескертпе жасап, мәжіліске қайтарған. Мәжіліс жобаға жасалған түзетулер оның концепциясын бұзбайтынын хабарлады.

Түзету жобасында жылдамдықты асырғаны үшін салынатын айыппұлды азайту қарастырылған. Қолданыстағы заң бойынша, жылдамдықты сағатына 10 километрден 20 километрге дейін асырғаны үшін 10 айлық есептік көрсеткіш (АЕК, бір айлық есептік көрсеткіш - 2269 теңге) көлемінде айыппұл салынатын болса, түзетулер жобасында айыппұл мөлшерін бес АЕК-ке дейін азайту қарастырылған. Сонымен қатар, «жол қиылысы мен торабынан өту ережесін бұзғаны» үшін салынатын айыппұлды 10 АЕК-тен үш АЕК-ке дейін азайту да қарастырылған. Қазіргі заң бойынша, жолдың қарсы бетіне шығып кеткені, оның ішінде айналып және бұрылып шығып кеткені үшін жүргізуші куәлігінен бір жылға дейін айырылатын болса, түзету жобасында бұл мерзімді алты айға дейін азайту көзделіп отыр.

Қазақстан бас прокуратурасы биылғы жылдың басында айыппұлды көбейту жолда заң бұзушылықты азайтпайтынын айтып, айыппұл көлемін азайтуды ұсынған. Бұдан өзге, прокуратура елде тұрғындардың табысы азайғанын, ал кейбір айыппұл көлемі соңғы 15 жылда бірнеше есеге ұлғайтылғанын айтқан.

Қазақстан әлемде жол-көлік оқиғасы салдарынан адам көп құрбан болатын елдер қатарында тұр.

Пікіріңіз

Оқырман пікірлері

XS
SM
MD
LG