10 қаңтарда Тәжікстан президенті Эмомали Рахмон Өзбекстан премьер-министрі Абдулла Ариповты қабылдады.
Тәжікстан президенті баспасөз қызметінің хабарлауынша, кездесу барысында Рахмон мен Арипов екі ел шекарасындағы миналанған аймақтарды тазарту мәселесін талқылады. Сондай-ақ тараптар екі ел азаматтарының шекарадан өтуін жеңілдетуге келісті. Өзбекстан алдағы уақытта Тәжікстан азаматтарына виза беру тәртібін оңайлатпақ.
Өзбек-тәжік шекарасындағы миналанған аймақ екі ел арасындағы негізгі мәселе саналады. 1999-2011 жылдары өзбек-тәжік шекарасының миналанған аймағында 160 тәжікстандық зардап шегіп, 76 адам мерт болған. Өзбекстан тарапынан да адам шығыны бар. Бірақ ол туралы ашық айтылмайды.
Ариповтың Душанбеге сапары 11 қаңтарда аяқталады.
