Accessibility links

Бірнеше облыс пен қалада мектептерде сабақ болмайды


Үйілген қар, Астана (Көрнекі сурет)
Үйілген қар, Астана (Көрнекі сурет)

22 қаңтарда Қазақстанның солтүстік облыстарында қатты аяздан мектептерде сабақ тоқтатылды. Астанада дүйсенбі күні ауа-райына байланысты 1-11 сынып оқушыларына және колледждің бірінші ауысымда оқитын 1-2 курс студенттеріне сабақ болмайды.

"Қазгидромет" мекемесінің хабарлауынша, Астанада бүгін таңертең ауа температурасы -34 градусқа дейін төмендеген. Желдің жылдамдығы секундына 4 метрге дейін жетеді.

Сонымен қатар Павлодар облысы мен Семейде 1-11 сынып оқушылары мен колледждің 1-2 курс студенттеріне сабақ тоқтатылды. Солтүстік Қазақстан және Ақмола облыстарында 1-11 сынып оқушыларына, Қостанай және Өскемен қалаларында бірінші ауысымда оқитын 1-9 сынып оқушыларына сабақ болмайды.

"Қазгидромет" 22-26 қаңтар арасында Қазақстанның бірнеше облысында күндіз -30-35, түнде -40-45 градусқа дейін аяз болатынын ескерткен.

XS
SM
MD
LG