Accessibility links

Өртенген автобус жүргізушілері қамалды


Ақтөбе облысында өртенген автобус. 18 қаңтар, 2018 жыл.

Өртенген автобустың үш жүргізушісі тергеу изоляторына қамалды. Бұл туралы Ақтөбе облыстық прокуратурасының аппарат жетекшісі Жасұлан Дәулембаев өзінің Facebook парақшасында хабарлады.

Жүргізушілерде Қазақстан Қылмыстық кодексінің 345-бабы (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) 4-тармағы бойынша айып тағылған. Бұл тармақ бойынша бес жылдан он жылға дейін бас бостандығынан айыру жазасы қарастырылған.

Жасұлан Дәулембаевтың мәліметінше, автобустағы өрттен аман қалған үш қазақстандық 24 қаңтар күні кешкі онда Ақтөбедегі тергеу изоляторына қамалған. Күдіктілерді ішкі істер министрлігі тергеу департаментінің жедел-тергеу тобы тергеп жатыр. Алдын-ала тергеу кезінде автобус жүргізушілерінің салонды дәнекерлеуші лампамен жылытып, автокөлікті пайдалану ережесі мен өрт қауіпсіздігі ережесін бұзғаны анықталған.

Тергеу автобустың өртеніп кетуіне үш жүргізушіні де айыптайды. Бұл қылмыстық істің тергелу барысын бақылау процессуалдық прокурорлар тобының 1-қызметіне, Ақтөбе және Оңтүстік Қазақстан облыстық прокуратурасына жүктелген.

Жасұлан Дәулембаев істі Қазақстанның бас прокуратурасы мен ішкі істер министрлігі де бақылап отырғанын хабарлады.

  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

Пікірлерді көріңіз (3)

Бұл форум жабық. Бірақ пікірталасты Азаттықтың Facebook-парақшасында жалғастыра аласыз: https://www.facebook.com/azattyq
XS
SM
MD
LG