Ресей сыртқы істер министрі Сергей Лавров Ресейдің Бас барлау басқармасының бұрынғы офицері Сергей Скрипальді улауға қатысы барын жоққа шығарды. Ол Ресей Ұлыбританияның Сергей Скрипальдің улануына қатысты сауалдарына Лондон Мәскеуге іс материалдарын бермейінше жауап қатпайтынын мәлімдеді.
Министрдің сөзінше, Ресей британ билігінен Скрипаль мен оның қызын улаған делінген затты сұраған, бірақ Лондон оны беруден бас тартқан. Лавров Мәскеу ол затты Скрипальдің қызы Юлияның Ресей азаматы болғандықтан сұратқанын айтады. "Лондон Ресейге ультиматум қоюдың орнына Химиялық қаруға тыйым салу туралы конвенция бойынша міндеттемесін орындауы тиіс" деп мәлімдеді Лавров.
Кеше Ұлыбритания премьер-министрі Тереза Мэй ел парламентінде тергеушілер Скрипаль мен оның қызы адамның жүйке жүйесін зақымдайтын, СССР кезінде жасалған затпен уланған деген қорытынды жасағанын мәлімдеген. Мэй осыған байланысты Ресей Ұлыбританияға қарсы әскери улайтын зат қолданған болуы мүмкін, я Мәскеу әскери өнімдерін қатаң қадағалай алмағандықтан олар үшінші тараптың қолына түскен болуы мүмкін екенін айтқан. Мэй Ресейге бұл заттың Ұлыбританияға қалай жеткенін түсіндіруге бір күн уақыт берген. Бұл мерзім аяқталған соң британ билігі Ресейге қатысты жауап шараларын жариялауы мүмкін.
Бұған дейін Ресей Сыртқы істер министрлігінің ресми өкілі Мария Захарова Тереза Мэйдің парламенттегі сөзін "цирктегі сайқымазақ" деп атаған.
2017 жылы қыркүйекте Ресей билігі елдегі химиялық қаруды түгел жойғанын мәлімдеген.
4 наурызда ГРУ-дың экс-офицері Сергей Скрипаль мен қызы Юлия Ұлыбританияның Солсбери қаласында жүйке жүйесін зақымдайтын заттан уланып, ауыр халде ауруханаға түскен.
Жаһан жаңалықтары: Сергей Скрипальді улау (09.03.2018)
