Ұлыбританияның Мәскеудегі елшісі Лори Бристоу Ресей сыртқы істер министрлігі бұрынғы ресейлік барлау офицері Сергей Скрипальды Англияның оңтүстігіндегі Солсбери қаласында уландыру оқиғасына қатысты Мәскеудің пікірін жеткізу үшін наурыздың 21-і күні шақырып отырған кездесуге қатыспайды. Бұл туралы бүгін Ұлыбританияның Ресейдегі елшілігі мәлімдеген.
"Елші кездесуге қатыспайды", - деген Мәскеудегі британ елшілігінің баспасөз хатшысы Зиент Ханч AFP агенттігіне.
Бұған дейін ТАСС агенттігі Еуропа Одағының Ресейдегі өкілдігі басшысының орынбасары Свен-Олов Карлссон Солсберидегі Сергей Скрипальдың улануына байланысты қалыптасқан жағдай жөнінде түсініктеме беру үшін Ресей сыртқы істер министрлігі шақырған елшілер кездесуіне қатысады деп хабарлаған.
Ресей сыртқы істер министрлігі наурыздың 21-іне Мәскеудегі барлық шетелдік елшілерді Скрипальдың ісін талқылау үшін Қару-жараққа бақылау және оны таратпау мәселелері жөніндегі департамент басшылығы және сарапшыларымен кездесуге шақырған.
