Бішкектегі "Ала-Тоо" мейрамханасында ас ішкен адамдар жаппай уланып қалған деп хабарлады Азаттықтың Қырғыз қызметі.
Республикалық жұқпалы аурулар клиникалық емханасының бас дәрігері Гүлжігіт Әлиевтің айтуынша, қазіргі кезде астан уланғандар саны 52 адамға жеткен.
- Арасында жеті бала бар, ең кішісінің жасы екіде. Зардап шеккендер қатары әлі де көбеюі мүмкін, - деген Әлиев жексенбі күні.
Қырғызстан денсаулық сақтау министрлігі баспасөз қызметінің мәліметі бойынша, наурыздың 31-і күні Бішкектегі ауруханаларға астан улану белгісімен адамдар түсе бастаған.
"Қазіргі таңда зардап шеккендерге орташа дәрежедегі улану диагнозы қойылған" деп хабарлаған министрлік.
Мемлекеттік санитарлық-эпидемиологиялық орталық астан улану оқиғасына байланысты тексеру жүргізіп жатқаны хабарланды. Алдын ала мәлімет бойынша, күдікке ілінген мейрамханадан елдің әр түкпірінен келген 190-ға жуық адам ас ішкен.
Зардап шеккендерден алынған сынама қорытындысы үш тәуліктің ішінде белгілі болмақ.
