Accessibility links

СҚО: Қызылжар ауданында көпірді су шайды


Қызылжар ауданының Новоникольск ауылында су басқан көпірден өте алмай тұрған тұрғындар. Солтүстік Қазақстан облысы, 20 сәуір 2018 жыл.

Солтүстік Қазақстан облысының (СҚО) Қызылжар ауданындағы Новоникольск ауылына өтетін көпірді су шайып кетті деп хабарлайды Азаттық тілшісі. Есіл өзеніндегі Сергеевка бөгенінен тасыған су Қызылжар ауданына жетіп, ауыл тұрғындарын әбігерге салды.

Новоникольск ауылы тұрғындарының айтуынша, елді мекенге келген тасқын су сағат сайын көтеріліп жатыр. Тұрғындар облыс орталығына қатынау қиындағанын айтады. Жергілікті биліктің айтуынша, су деңгейі санаулы күнде үш жарым метрге дейін көтерілген.

- Биыл су тез көтерілді. Сергеевка бөгеніндегі суды жібергені сол еді, шамамен төрт күнде ол бізге жетті. Екі сағаттың ішінде су 15-20 сантиметрге дейін көтерілді. Қазір көпірді су басып қалды, - дейді ауыл әкімі Елена Захарова.


Төтенше жағдай қызметі мамандарының хабарлауынша, Есілдің Сергеевка бөгеніндегі су деңгейі бір тәулікте 8 сантиметрге көтерілген. Бүгінгі күні жергілікті атқарушы органдар мен төтенше жағдай мамандары өзен бойындағы елді мекендер орналасқан жерлерге арнайы бақылау бекеттерін орналастырған. Олар Қызылжар ауданындағы Жарқайың және Новокаменка ауылдары, Есіл ауданындағы Николаевка және Семипалатное ауылдарында қойылған. Қызылжар ауданындағы Новоникольск ауылы облыс орталығынан 70 шақырым қашықта тұр. Ресми мәлімет бойынша, ауылда 1345 адам тұрады.

  • 16x9 Image

    Нұргүл АЛИНА

    Нұргүл Алина – Азаттықтың Петропавлдағы тілшісі. 1990 жылы туған. Солтүстік Қазақстан мемлекеттік университетін журналистика мамандығы бойынша тәмамдаған. Заң және  әлеуметтік білімдер магистрі. 

    Азаттықпен 2016 жылдан бері әріптес.

     

Пікірлерді көріңіз (4)

Бұл форум жабық. Бірақ пікірталасты Азаттықтың Facebook-парақшасында жалғастыра аласыз: https://www.facebook.com/azattyq
XS
SM
MD
LG