Accessibility links

Шымкентте "баласын ұрған" әйел сотталды


Көрнекі сурет.

Шымкенттегі Оңтүстік Қазақстан облыстық кәмелетке толмағандар ісі жөніндегі мамандандырылған ауданаралық соты "алты жастағы баласын ұрып-соғып, жан сақтау бөліміне түсірді" деп айыпталған Сайрам ауданы Қарабұлақ ауылының тұрғыны 37 жастағы Назира Бекбаеваны 5 жылға бас бостандығынан айыру туралы жаза кесті. Азаттық тілшісінің соттан хабарлауынша, судья Қанатбек Қоңырбаев жазаны 5 жылдан кейін өтеуге үкім етті.

Заң бойынша кәмелет жасқа толмаған ауру баласы бар ата-аналар жазасын кейін өтейді. Адвокаттардың айтуынша, сотталған Бекбаеваның 7 жастағы қызы жүрек ауруына шалдыққан және оған жақын арада операция жасалмақ.

20 ақпанда қарай бастаған істің үкімі 25 сәуір күні жарияланды.

Назира Бекбаева Қылмыстық кодекстің 106-бабы 2-бөлігінің 4-11-тармағы ("Денсаулыққа қасақана ауыр зиян келтіру") және 140-бабы 2-тармағы (Кәмелетке толмаған адамды тәрбиелеу жөнiндегi мiндеттердi орындамау) бойынша айыпты деп танылды. "Қылмыстық кодекстің 74-бабының 1-бөлігін қолдана отырып, сотталған Бекбаеваның жазасын өтеу мерзімі бес жыл мерзімге кейінге қалдырылсын" деді судья Қоңырбаев.

Сотталған Назира Бекбаева зот залынан босатылды.

Назира Бекбаеваның қорғаушысы Жұмабек Тоғызбаев Азаттық тілшісіне үкімге апелляциялық шағым түсірмейтінін айтты.

2017 жылдың 9 желтоқсанында Сайрам ауданы Қарабұлақ ауылының тұрғыны Назира Бекбаева 6 жастағы баласын ұрып-соғып аурухананың жан-сақтау бөліміне алып келген. 10 желтоқсан күні оның үстінен Қылмыстық кодекстің "Денсаулыққа қасақана ауыр зиян келтіру" бабы бойынша іс қозғалып, қамауға алынған.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

XS
SM
MD
LG