Accessibility links

Алматы мен Астанада ашаршылық құрбандарын еске алды


"Жаңа Қазақстан" форумының мүшелері - саясаткер Әміржан Қосанов (сол жақта), саясаттанушылар Дос Көшім (оң жақта) және Расул Жұмалы ашаршылық құрбандары ескерткішіне гүл шоғын қойып жатқан сәт. Алматы, 31 мамыр 2018 жыл.

Алматыда 31 мамыр күні бір топ қоғамдық белсенді мен қала тұрғындары ашаршылық пен саяси қуғын-сүргін құрбандарын еске алды деп хабарлайды Азаттық тілшісі. "Жаңа Қазақстан" форумының өкілдері Әміржан Қосанов, Расул Жұмалы, саясаттанушы Дос Көшім, журналист Гүлжан Ерғалиева қаладағы Наурызбай мен Қабанбай көшелерінің қиылысындағы, бұрынғы НКВД ғимараты алдындағы саябақта 1931-1933 жылдардағы ашаршылық құрбандарына арналған ескерткішке гүл шоғын қойды.

Ескерткішке ара-тұра қала тұрғындары да келіп гүл қойып, тағзым етіп жатыр. Еске алуға бүгін таңертең Алматы әкімі Бауыржан Байбек те келіп, гүл қойғанын айтты.

"Жаңа Қазақстан" өкілдері таңертең форум мүшесі, құқық қорғаушы Ғалым Ағелеуовті полиция ұстап әкеткенін, бірақ кейін босатқанын, саясаткер Жасарал Қуанышәлиннің үйіне де полиция барғанын айтты. Олар мұны Қазақстандағы саяси қуғын-сүргіннің жалғасы деп білетінін айтты.

Саябақ маңында еске алуға келгендерде полиция қызметкерлері қарауылдап жүрді.

Ашаршылық құрбандарын еске алу шарасы Астанада да өтті. Қаладағы Мемлекеттік рәміздер алаңына Жалпыұлттық социал-демократиялық партия мен тіркеуден шығарылған "Алаш жолы" қозғалысының он шақты мүшесі жиналып, гүл шоғын қойды және құран бағыштады. Еске алуға келген саясаткер Зәуреш Батталованың айтуынша, 2008 жылға дейін бұл жерде саяси қуғын-сүргін құрбандарына арналған ескерткіш болған. Кейін оны мемориалдық АЛЖИР кешеніне алып кеткен. Қазір Астанада саяси қуғын-сүргін құрбандарына арналған ескерткіш жоқ.

Саяси қуғын-сүргін және ашаршылық құрбандарын еске алуға жиналғандар құран бағыштап отыр. Астана, 31 мамыр 2018 жыл.
Саяси қуғын-сүргін және ашаршылық құрбандарын еске алуға жиналғандар құран бағыштап отыр. Астана, 31 мамыр 2018 жыл.

31 мамыр - Қазақстанда саяси қуғын-сүргін және ашаршылық құрбандарын еске алу күні. Ашаршылық тарихын зерттеуші кей мамандардың деректері бойынша, 1931-1933 жылдары қазақ даласында болған ашаршылық салдарынан екі миллионға дейін адам құрбан болған.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

ПІКІРЛЕР

AzattyqTV

AzatNews 22.06.2018
please wait
Embed

No media source currently available

0:00 0:14:18 0:00
XS
SM
MD
LG